У Польшчы Касцёл заклікаў спыніць распальванне варожасці да ўкраінцаў
Сталая рада Канферэнцыі епіскапату Польшчы выступіла са спецыяльным зваротам на фоне распальвання шавіністычнай прапаганды.
Апошнія месяцы ў Польшчы ўсё часцей паведамляюць пра напады на ўкраінцаў і інцыдэнты. Грамадства стамілася ад мільёнаў уцекачоў, якія завіслі ў краіне на гады. Паводле звестак польскай паліцыі, толькі за першае паўгоддзе 2026 года было зарэгістравана 180 паведамленняў пра меркаваныя злачынствы на глебе нянавісці супраць грамадзян Украіны. Гэта больш чым на 30% перавышае паказчык за той жа перыяд мінулага года.
На гэтым фоне Сталая рада Канферэнцыі епіскапату Польшчы апублікавала зварот аб польска-ўкраінскім прымірэнні.
«Усе гэтыя выпадкі, незалежна ад таго, маюць яны нацыянальную, хуліганскую ці крымінальную глебу, заслугоўваюць асуджэння», — гаворыцца ў дакуменце.
Біскупы нагадалі, што пасля пачатку поўнамаштабнай вайны ва Украіне ў лютым 2022 года сотні тысяч украінскіх уцекачоў перасякалі польскую мяжу. Палякі адкрывалі ім свае дамы і кватэры, а валанцёрскія арганізацыі дапамагалі з харчаваннем, медыцынскай, фінансавай, юрыдычнай і іншай дапамогай.
«Увесь гэты час мы як Касцёл заўсёды стаім на баку тых, хто пацярпеў найбольш, сем'яў ахвяр вайны, тых, хто пакутуе і часта ўжо не мае куды вярнуцца», — заявілі біскупы.
Яны нагадалі, што Канферэнцыя епіскапату Польшчы неаднаразова заклікала да салідарнасці з Украінай і прымірэння двух народаў, адносіны якіх пазначаныя балючымі гістарычнымі ранамі.
«Мы шчыра верым, што гэтыя раны могуць загаіцца, а над імі возьмуць верх узаемная павага і прымірэнне», — гаворыцца ў звароце.
Каталіцкія іерархі звярнуліся «да вернікаў і няверуючых, да людзей добрай волі ў Польшчы» з заклікам шукаць у польска-ўкраінскіх адносінах «перадусім дух прымірэння і хрысціянскай любові».
«Мы заклікаем да сумленнага гістарычнага дыялогу, каб цёмныя плямы нашай супольнай гісторыі былі цалкам высветленыя», — заявілі біскупы. Яны таксама заклікалі не распальваць варожасць на нацыянальнай глебе.
Асобна іерархі звярнуліся да польскіх уладаў з заклікам больш эфектыўна прадухіляць інцыдэнты на нацыянальнай глебе і адначасова забяспечваць выкананне закона ўсімі, хто знаходзіцца ў краіне.
Гэты зварот польскіх біскупаў перагукаецца са знакамітым зваротам «Прабачаем і прабачэння просім», накіраваным польскімі біскупамі нямецкім у 1965 годзе. Улады ПНР скарысталі гэта як нагоду для бруднай атакі на Касцёл — маўляў, зварот непатрыятычны. Але той зварот праклаў дарогу да будучага прымірэння немцаў і палякаў і ўстойлівага міру між гэтымі народамі. Адным з аўтараў таго звароту быў будучы папа Ян Павел ІІ, святы Караль Вайтыла.
Чым цяпер займаюцца дзяўчаты, якіх летась назвалі самымі прыгожымі ў Беларусі?9
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2121
Каментары