Тры аўтамабільныя брэнды з найгоршымі кіроўцамі: ці ёсць вашая машына ў спісе?
Калі вы калі-небудзь жартавалі, што можаце пазнаць канкрэтную марку машыны па кепскім кіроўцы за рулём, то даныя страхавых кампаній гатовыя гэта пацвердзіць. Даследаванне партала LendingTree прааналізавала статыстыку 30 папулярных аўтамабільных брэндаў і падлічыла колькасць інцыдэнтаў у ЗША (аварый, выпадкаў кіравання ў п'яным выглядзе, штрафаў за хуткасць і іншых парушэнняў) на 1 000 кіроўцаў за перыяд з 1 студзеня па 16 снежня 2025 года.
ТОП-3 брэндаў паводле колькасці парушэнняў
Вынікі аказаліся даволі красамоўнымі: тройку антылідараў узначалілі BMW, Tesla і Ram.
BMW — 44,9 інцыдэнтаў на 1 000 кіроўцаў (або 4,49%). Кіроўцы гэтай нямецкай маркі дэманструюць найвышэйшы ўзровень аварыйнасці і парушэнняў у ЗША.
Ram — 44,7 інцыдэнтаў на 1 000 кіроўцаў (4,47%). Уладальнікі магутных пікапаў ідуць практычна ў нагу з лідарам рэйтынгу.
Tesla — 42,8 інцыдэнтаў на 1 000 кіроўцаў (4,28%). Электракары, якія ўзначальвалі гэты спіс летась, сёлета спыніліся на трэцім месцы.
Для параўнання, у іншых папулярных марак (такіх як Volkswagen, Mazda, Lexus, Infiniti, Hyundai і Toyota) гэты паказчык значна ніжэйшы і вагаецца ў межах ад 20 да 30 інцыдэнтаў.
Аварыі і алкаголь: у каго якія праблемы?
ДТП
Тут першае месца займае Tesla — ад 26 да 27 аварый на 1 000 кіроўцаў. Адзінымі брэндамі, якія таксама перасягнулі адзнаку ў 20 аварый на тысячу, сталі Ram і Subaru.
Кіраванне ў стане ап’янення
Найвышэйшы ўзровень п'яных кіроўцаў зафіксаваны ў BMW (больш за 3 выпадкі на 1 000 кіроўцаў), што амаль удвая больш, чым у брэнда Ram, які ідзе следам.
Чаму менавіта гэтыя маркі?
Даследчыкі вылучаюць некалькі гіпотэз, чаму менавіта гэтыя машыны часцей трапляюць у зводкі. Шпаркія электрамабілі з імгненным разгонам (Tesla), магутныя рухавікі (BMW) і цяжкія пікапы (Ram) самі па сабе могуць падштурхоўваць да больш агрэсіўнай язды.
Акрамя таго, BMW і Ram маюць агрэсіўны дызайн. Магчыма, і гэта прыцягвае кіроўцаў, схільных выпрабоўваць межы дазволенага, часцей рызыкаваць на дарозе.
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары
Ужо 16 гадоў, як Dodge і Ram сталі незалежнымі адзін ад другога аўтавытворцамі, а ў невероятных гэта ўсё адно й тое ж.