Радзільныя дамы спаборнічаюць, у каго 3 ліпеня народзіцца больш дзяцей
У ход ідуць усе магчымыя хітрыкі.
Супрацоўнік аднаго з беларускіх радзільных дамоў распавёў «Нашай Ніве», што яшчэ ўчора кіраўніцтва паставіла задачу: 3 ліпеня павінна нарадзіцца як мага больш беларусаў.
— Сказалі: «Ну вы ж разумееце, заўтра вялікае свята, усе радзільныя дамы будуць спаборнічаць, каб нарадзілася больш дзяцей. Таму мы павінны пастарацца, каб вынікі былі прыгожыя».
Суразмоўца адзначае, што ў яго радзільні ёсць выпадкі і стымуляцыі родаў. Цяжарных угаворваюць пачаць нараджаць любым коштам у «прыгожую дату». Спрабуюць матываваць падарункамі — маўляў, потым прыедзе нехта з чыноўнікаў віншаваць.
Першую аперацыю зрабілі ўжо ў ноч на 3 ліпеня, каб можна было потым у справаздачы пазначыць, што дзіця нарадзілася ў першыя хвіліны Дня Незалежнасці.
Доктар кажа, што гэта не новая практыка: штогод 3 ліпеня з'яўляецца для радзільных дамоў Беларусі самай ідэалагічна важнай датай.
Дарэчы, летась Міністэрства аховы здароўя хвалілася, што ў Дзень Незалежнасці ў краіне нарадзіліся ажно 173 дзіцяці, а гэта больш за сярэдні паказчык за дзень.
Трэба адзначыць і цікавую тэндэнцыю: агулам нараджальнасць у Беларусі падае, але ж менавіта 3 ліпеня штогод назіраецца павелічэнне колькасці нованароджаных. У 2024 годзе іх было 158, у 2023‑м — 118.
На другім месцы па значнасці ідзе навагодняя ноч.
Прапаганда сапраўды любіць выкарыстоўваць дзяцей, якія нарадзіліся ў першыя хвіліны нейкага святочнага дня. Часам даходзіць да абсурду. Напрыклад, у 2023 годзе праўладныя СМІ з захапленнем пісалі пра Юлію Мацюшэўскую, якая нарадзіла дачку ў першую хвіліну года — адразу, як паслухала навагодні зварот Лукашэнкі.
Віншаваць жанчыну ў «Маці і дзіця» прыехала Наталля Эйсмант. У відэа Пула першага гісторыя выглядала максімальна патрыятычнай. Атрымлівалася, што Юлія папрасіла анестэзіёлага ўключыць зварот Лукашэнкі — а дзіця так было ўражана яго прамовай, што паспяшалася нарадзіцца.
Але па другім інтэрв’ю жанчыны можна зразумець, што сітуацыя была іншай. Яе шпіталізавалі 29 снежня, бо былі медыцынскія паказанні. Планавалі зрабіць кесарава сячэнне 4 студзеня, але ў выніку зрабілі ў навагоднюю ноч — дык так удала, што ў медыцынскіх дакументах з’явілася прыгожае 00.01.
У Мінску ціха зачынілі раддом №3 на вуліцы Леніна
Зрабіць ЭКА за кошт дзяржавы можна будзе толькі ў адным медцэнтры. А другую бясплатную спробу дадуць не ўсім
У беларускіх радзільнях няма прэпарату, які неабходны нованароджаным
У беларускіх радзільнях бяруць у закладнікі немаўлят, якіх нарадзілі мігранткі, каб спагнаць з бацькоў грошы? Разбіраемся
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары