У Віцебску прадаюць будынак былога хедэра, дзе вучыўся Марк Шагал
Гістарычны помнік у цэнтры Віцебска, дзе спасцігаў азы навукі сусветна вядомы мастак і дзе чыноўнікі гадамі абяцалі стварыць музей, прадаюць пад гасцініцу.
Электронныя таргі па рэалізацыі будынка былой яўрэйскай школы на вуліцы Калініна, 1 прызначаны на 17 ліпеня бягучага года. Пачатковая цана гэтага гістарычнага лота складае каля 813 тысяч рублёў. У красавіку горад ужо спрабаваў прадаць права арэнды гэтай нерухомасці, прычым за сімвалічныя грошы, пакідаючы магчымасць выкупу на потым. Але тады аўкцыён не адбыўся, цяпер прадаюць сам будынак.
Ад новага гаспадара чакаюць маштабнай рэканструкцыі, у выніку якой у будынку плошчай амаль 500 квадратных метраў павінен з'явіцца шматфункцыянальны комплекс з гасцініцай і ўстановай грамадскага харчавання. Часу на рэалізацыю праекта даюць крыху больш за тры гады — комплекс мусіць быць уведзены ў эксплуатацыю не пазней за 31 снежня 2029 года.
Паколькі будынак мае статус гістарыка-культурнай каштоўнасці, інвестару давядзецца на працягу месяца падпісаць ахоўнае абавязацельства.
Да 1917 года тут працаваў хедэр — традыцыйная рэлігійная пачатковая школа, дзе з трох да трынаццаці гадоў вучыўся Марк Шагал. У гэтых жа сценах атрымліваў адукацыю выбітны скульптар Восіп Цадкін, а сярод выкладчыкаў быў дзед брытанскага філосафа Ісаі Берліна.
У савецкія і постсавецкія часы ў гістарычных сценах працаваў гарадскі радыётрансляцыйны вузел. Пасля яго закрыцця помнік архітэктуры пачаў занепадаць. У мінулым дзесяцігоддзі віцебскія ўлады неаднаразова агучвалі грандыёзныя планы па стварэнні тут музея Юдэля Пэна і ўключэнні будынка ў турыстычны музейны квартал. Аднак на амбіцыйныя праекты не знайшлося грошай.
Каментары
Наш национальный код