Якія прадуктовыя сеткі з'явіліся і зніклі ў Беларусі ў апошнія гады? Такіх нямала
Днямі па сацсетках пайшлі чуткі, што крамы папулярнай сеткі дыскаўнтараў «Хіт!» у Беларусі паціху закрываюцца. Ці так гэта і як апошнім часам развіваюцца сеткі крам у краіне? Выданне Blizko.by вывучыла ўсё самае цікавае.
Што там з «Хітом»?
Нядаўна ў сацсетцы Threads заўважылі, што нейкія крамы сеткі «Хіт!» (яе развівае кампанія «Еўрагандаль») сталі закрывацца. Напрыклад, у Мінску і ў Дзяржынску, паводле заўваг відавочцаў, быў «Хіт!» — стаў «Еўраопт». І гэта нібыта не адзінкавыя прыклады.
Выданню «Анлайнер» у сетцы пацвердзілі, што частку крам пад гэтым брэндам сапраўды закрываюць і паступова пераводзяць у іншыя фарматы, у тым ліку ў «Еўраопт». Так, за апошнія тры гады цэлых 140 крам вось так змянілі фармат. Але больш за 200 «Хітоў» па-ранейшаму працуюць, і хоць нейкія яшчэ, напэўна, памяняюць шыльды, усе крамы «Хіт!» закрываць не будуць. Але і новыя адкрываць больш не стануць.
Увогуле ж сеткі крам ваююць за купцоў і пастаянна трансфармуюцца. Нейкія растуць, нейкія ўціскаюцца. Адныя закрываюцца, на іх месца прыходзяць новыя. Камусьці ўдаецца хутка вырасці і стаць буйной сеткай, іншыя так і застаюцца мікрасеткамі на некалькі крам. Некаторыя ж крамы застаюцца гордымі адзіночкамі.
У гэтым артыкуле гаворка пра тыя новыя шыльды, якія з'явіліся ў Беларусі апошнім часам, а таксама тыя старыя, якія пакінулі ці абмежавалі рынак.
Новыя адкрыцці
«UNISTORE опт&розніца»
Сетку развівае кампанія «ЮніСтор Груп», яна ж вядзе сеткі крам «Вожык» і «Сем пятніц». Першая мінская крама адкрылася ў маі 2021 года, дакладней, адміністрацыйна яна знаходзіцца па-за сталіцай, у раёне вёскі Баравая ў Бараўлянскім сельсавеце, на выездзе з Мінска па Лагойскім тракце.
Цяпер у сетцы 8 крам: па адной у Брэсце, Віцебску, Гомелі, Гродне, Салігорску. Таксама фармальна ўсяго адна крама ў Мінску (у Каменнай Горцы) і яшчэ дзве пад Мінскам: ужо згаданая ў Баравой і ў Сеніцкім сельсавеце, адразу за МКАД у гандлёвым цэнтры «Сеніца» (прычым на сайце кампаніі маркер на карце стаіць не на сваім месцы).
«Разумны выбар»
Сетку «Разумны выбар» запусціла кампанія «Лібрэтык» — тая самая, што развівае сетку «Суседзі». Першыя дзве крамы адкрыліся ў Баранавічах у студзені 2022 года.
Цяпер у сетцы ёсць 26 крам у 13 гарадах краіны (пераважна ў райцэнтрах). З іх у Мінску ўсяго 3 пункты (і яшчэ адзін у пасёлку Юбілейны за Сеніцай). Сетка пазіцыянуе сябе як новы фармат штодзённых купляў: усё самае патрэбнае, побач і па нізкіх цэнах.
«Белка»
Крама «Белка» адкрылася ў сталічнай Лошыцы на пачатку 2022 года — ТАА «100рытэйл» запусціла пункт на вуліцы Уладзіслава Сыракомлі. З таго часу тая крама зачынілася, але цяпер у Мінску працуюць яшчэ тры: дзве на праспекце Дзяржынскага і адна на вуліцы Ціміразева.
Сайта ў крамы няма, проста яшчэ адна невялікая сетка. Нагадвае сетку «Зялёны клён», адна з крам якой, да слова, таксама ёсць у Лошыцы (але кіруе ёй іншая кампанія).
«Квасоўскі»
Пра гэтую сетку вы напэўна не чулі, хоць пра кампанію, якая стаіць за ёй, чуць маглі. Прынамсі, калі вы жывяце ў Гродзенскай вобласці. У вёсцы Квасоўка пад Гроднам працуе знакаміты вытворчы кааператыў імя Віталя Крамко, які вырас з калгаса «Кастрычнік» і вядзе сваю гісторыю з 1949 года. Калгас, а пасля і кааператыў неаднаразова ўдастойваліся дзяржаўных узнагарод.
Сваю прадукцыю прадпрыемства рэалізуе ў тым ліку праз уласную сетку «Квасоўскі». Усяго ў ёй 5 крам: чатыры ў Гродне і раёне і адна ў Мінску — шукайце яе ў мікрараёне Брылевічы. Сталічная крама адкрылася ў снежні 2022-га.
«Спутнік»
Крамы «Спутнік» (амаль з такім жа лагатыпам, які быў у закрытай аднайменнай расійскай пошукавай сістэмы) з'явіліся ў верасні 2023 года: так пераназвалі гіпермаркеты гіпердыскаўнтара «Святлафор». Тады купцам абяцалі, што цэны ў абедзвюх сетках будуць аднолькавымі.
Старонка са спісам крам на сайце новай сеткі зламаная, а пошукавікі паказваюць, што ў Мінску «Спутнік» толькі адзін — на вуліцы Каржанеўскага — плюс яшчэ адзін адразу за МКАД, у гандлёвым цэнтры DiaMond City. Таксама «Спутнікі» знайшліся ў абласных цэнтрах (акрамя Брэста), Бабруйску, Барысаве, Жлобіне, Лідзе, Мазыры і Оршы — разам 12 пунктаў.
«Выгада»
Дыскаўнтар «Выгада!» — гэта ўтварэнне ЗАТ «Юніфуд», якое развівае сетку «Алмі», менавіта так называецца зніжкавая праграма ў гэтай сетцы. Дык вось, першая крама «Выгада!» адкрылася ў лютым 2024‑га ў Гродне (зноў Гродна!) з банэрамі «Нізкія цэны! Кожная купля з выгадай!».
Тады, два з лішнім гады таму, СМІ расказвалі, што «Выгада!» стане новай сеткай, у якую можа перайсці частка крам «Алмі». На тое, што ўсё ж такі плануецца сетка, паказвае і загаловак «Адрасы крам» на новым сайце. Вось толькі адрас так да гэтага часу і застаўся адным-адзіным.
«Местное известное»
Сетку «Местное известное» запусціла кампанія «Грынрозніца» — тая самая, якая кіруе сеткай супер– і гіпермаркетаў Green. Як паведамляе сайт сеткі, «Местное известное» — гэта гандлёвая марка правільнага харчавання, уся прадукцыя натуральная, вырашчаная ў экалагічна чыстых мясцовасцях як у Беларусі, так і за яе межамі.
Першыя пяць крам адкрыліся ў Мінску 21 чэрвеня 2024 года, але вось асобнага сайта ў новай сеткі знайсці не змаглі (ці хоць бы спіса крам на сайце Green). «Яндэкс.Карты» паказваюць, што цяпер у сетцы 4 крамы: тры па старых адрасах і адна новая. А вось яшчэ два пункты па старых адрасах, у Грушаўцы і Уруччы, з студзеня 2025‑га закрытыя.
«Знаёмы»
«Знаёмы» — гэта сетка, якую запусціў Барысаўскі камбінат хлебапрадуктаў. Першая крама адкрылася крыху больш за год таму, у студзені 2025-га, у Барысаве. Але па стане на чэрвень 2026‑га ў сетцы так і засталася гэтая адна крама. Чаму тады гаворыцца пра сетку? Таму што хлебакамбінат сам так і заяўляў: «УП «Барысаўскі камбінат хлебапрадуктаў» з гонарам абвяшчае пра адкрыццё новай рознічнай сеткі «Знаёмы». Першая крама адкрыецца ўжо заўтра…»
Наогул у камбіната ёсць ужо мінімум дзве ўласныя сеткі: «Уладар» і «Турэцкі кумпячок», а таксама асобныя крамы «Мельнік», «Каласок», «Мясны дом», «Пятачок», «Мяско», «Лагойчанка». Няхай вас не здзіўляюць мясныя крамы ў «хлебнай» сетцы, таму што Барысаўскі мясакамбінат з'яўляецца філіялам камбіната хлебнага. І пры такой складанай падпарадкаванасці ды мностве брэндаў здаецца, што на развіццё «Знаёмага» проста не засталося рэсурсаў.
А якія сеткі закрыліся?
«ПровиантЪ»
Сетка крам «ПровиантЪ» (менавіта ў такім напісанні) ад ТАА «ПравіянтГруп» была немаленькай для Мінска: да восені 2021 года ў сталіцы налічвалася 35 яе крам, яшчэ было 7 пунктаў у Баранавічах і адна крама ў Нясвіжы.
У розныя часы ў сетку «ПровиантЪ» уваходзілі магазіны «Савецкі» (у Баранавічах) і «Азарэнне». Але ўжо ў 2022‑м сетка проста закрылася. Частку яе крам выкупіла кампанія «Лібрэтык» (ёй належыць сетка «Суседзі»). Прычынай закрыцця сеткі «ПровиантЪ» называюць банкруцтва.
Spar
Spar — гэта буйная нідэрландская сетка крам з 90‑гадовай гісторыяй. Зараз па ўсім свеце працуюць больш за 13 800 крам у 48 краінах. Назва, дарэчы, перакладаецца як «елка» — яе стылізаваная выява ёсць на лагатыпе кампаніі.
У Мінску першая крама сеткі адкрылася ў жніўні 2017 года на Партызанскім праспекце, 40. Франшызай кіравала кампанія «Юніфуд», якая таксама развівала сеткі «Алмі» і Zakrama. Прадстаўнікі кампаніі казалі, што да 2020 года плануюць адкрыць 60 крам у розных гарадах Беларусі. Але ў выніку на ўсю краіну было ў 10 разоў менш крам: тры ў Мінску і па адной у Брэсце, Гродне, Бабруйску, Пінску, Кобрыне і Мазыры. Пры гэтым частка з іх мела назвы Eurospar і Interspar. А ў красавіку 2024‑га закрылася і апошняя сталічная крама гэтай сеткі (іх паціху перавялі ў сетку «Алмі»). Наколькі вядома Blizko.by, гэта самая буйная сусветная сетка крам, якая працавала і ў Беларусі.
«Еўрагандаль» перафарматоўвае свае крамы «Хіт!» Што будзе замест іх?
Беларусы скардзяцца, што любімыя сыркі з пандай ужо «не тыя». Ці змянілі рэцэпт пасля перадачы «Савушкаваму прадукту»?
У Мінск-Свеце адкрылася крама, у якой можна замовіць піцу ў касіра. Зробяць за тры хвіліны
«Толькі не спісвай слова ў слова». У Гродне адкрываюць краму «Кузнечик», падазрона падобную на польскую «Жабку»
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары