У махляроў новая пастка для пенсіянераў: адмовіцца амаль немагчыма
Ашуканцы намацалі чарговую схему, якая працуе амаль бездакорна, бо б'е па зразумелым жаданні чалавека атрымаць больш.
У махляроў цяпер новая замануха для пенсіянераў, паведамляюць брэсцкія міліцыянты. Спачатку пажылому чалавеку тэлефануе ветлівы голас, які прадстаўляецца сацыяльным работнікам ці супрацоўнікам пенсійнага фонду.
Незнаёмец агарошвае прыемнай навіной: вам належыць пераразлік выплат, дзяржава гатовая дакінуць грошай. Разлік ідэальны, бо хто адмовіцца ад прыбаўкі да пенсіі? І чалавек гатовы выканаць інструкцыю.
На гэтай хвалі махляры лёгка выманьваюць пашпартныя даныя або коды, якія прыходзяць чалавеку ў паведамленні на тэлефон.
Далей — стандартная схема. Тэлефануе нібыта праваахоўнік. Ён шакуе навіной, што злачынцы проста цяпер завалодалі асабістымі данымі пенсіянера і вось-вось скрадуць усё да капейкі. На чалавека пачынаюць ціснуць, уводзяць у стрэс і не даюць хвіліны, каб перавесці дух. Каб «выратаваць» свае кроўныя, пенсіянер бяжыць да банкамата і пераводзіць увесь ашчадак на «бяспечны рахунак» альбо проста выносіць пакунак з грашыма кур'еру.
Міліцыя раіць яшчэ раз нагадаць бацькам, бабулям і дзядулям. Калі размова заходзіць пра грошы або коды з смс — трэба проста кідаць слухаўку.
Каментары