«Санта Брэмар» хоча адсудзіць правы на брэнд у вядомага расійскага вытворцы, якога прызналі экстрэмісцкім за падтрымку УСУ
Вядомая беларуская кампанія «Санта Брэмар» мае намер пазбавіць расійскае прадпрыемства «КДВ Яшкіна» правоў на таварны знак «Топ-топ». Летась за падтрымку УСУ ўладальніка расійскіх брэндаў «Кірыешкі» і «Яшкіна» прызналі экстрэмістам і канфіскавалі ўсе актывы.
Кампанія «Санта-Брэмар» мае намер адсудзіць у расійскай «КДВ Яшкіна» правы на таварны знак «Топ-топ». Адпаведны пазоў прыняў да разгляду Суд па інтэлектуальных правах у Маскве, а папярэдняе пасяджэнне прызначана на 6 ліпеня, піша «Спутнік».
Беларускі бок абгрунтоўвае свае прэтэнзіі тым, што гэты брэнд даўно не выкарыстоўваецца расійскім уладальнікам.
У Расіі таварны знак «Топ-топ» быў зарэгістраваны для шырокай лінейкі кандытарскіх вырабаў — ад вафляў да шакаладу. Правы на яго пакуль застаюцца ў групы KDV, куды і ўваходзіць «КДВ Яшкіна».
У 2025 годзе Цвярскі суд Масквы прызнаў асноўнага ўладальніка кампаніі мільярдэра Дзяніса Штэнгелава і яго бацьку Мікалая «экстрэмісцкім аб’яднаннем» за фінансаванне ўкраінскага войска, пасля чаго іх маёмасць была канфіскаваныя ў даход дзяржавы.
Паводле версіі следства, Штэнгелаў-старэйшы спансаваў УСУ, а сын падтрымліваў яго дзеянні. Абодва мужчыны пражываюць за мяжой ужо больш за дзесяць гадоў.
Кампанія «Санта Брэмар», якая належыць брэсцкаму бізнэсмену Аляксандру Машэнскаму, актыўна развівае ўласную харчовую вытворчасць, у тым ліку папулярную серыю марожанага пад маркай «Топ». Паспяховае завяршэнне судовага працэсу дазволіць беларускаму вытворцу пашырыць правы на сугучны брэнд на расійскім рынку.
Цяпер чытаюць
У дзень пачатку Пецярбургскага эканамічнага форуму УСУ нанеслі дзясятак удараў па нафтавым тэрмінале ў порце горада і базе Балтфлота ў Кранштаце18
Каментары