Узброеная групоўка малійскіх туарэгаў Фронт вызвалення Азавада паведаміла, што пасля баёў супраць урадавых войскаў ёй удалося заняць большую частку горада Кідаль на поўначы краіны, паведамляе тэлеканал France 24. Раней Кідаль ужо лічыўся апорным пунктам паўстанцаў, але перад гэтым яго ўзяла пад кантроль армія Малі.
Сітуацыя і ў цэлым краіне застаецца напружанай. У горадзе Каці, недалёка ад сталіцы краіны Бамака, дзе знаходзіцца рэзідэнцыя кіраўніка Малі Асімі Гойта, вяліся інтэнсіўныя перастрэлкі.
Малiйская армія заявіла, што ўзброеныя групоўкі атакавалі некалькі вайсковых аб’ектаў у краіне і баі працягваюцца. Паводле сведкаў, стрэлы былі чутныя ў розных раёнах, у тым ліку каля міжнароднага аэрапорта ў сталіцы.
У 2012 годзе туарэгскія паўстанцы ўжо абвяшчалі пра стварэнне на паўночным усходзе Малі незалежнай дзяржавы Азавад і ўстанавілі кантроль над значнай часткай яго тэрыторыі. Аднак гэтае ўтварэнне не было прызнана міжнароднай супольнасцю і праіснавала ўсяго каля трох месяцаў.
Пазней канфлікт спрабавалі ўрэгуляваць. У 2015 годзе ў Алжыры было падпісана мірнае пагадненне паміж уладамі Малі і паўстанцамі-туарэгамі. Яно прадугледжвала спыненне баявых дзеянняў і пошук палітычнага вырашэння канфлікту. Аднак у студзені 2024 года ўрад Малі скасаваў гэтае пагадненне, што зноў абвастрыла сітуацыю і прывяло да новага росту напружанасці ў рэгіёне.
Цяперашні малійскі «прэзідэнт пераходнага перыяду» Асімі Гойта прыйшоў да ўлады ў 2020 годзе ў выніку вайсковага перавароту. Ён сярод іншага трымаецца пры ўладзе пры падтрымцы расійскага «Афрыканскага корпуса», у які былі пераўтвораныя былыя падраздзяленні сумнавядомага ПВК «Вагнер». Ва ўзятым туарэгамі горадзе Кідаль размяшчалася вайсковая база гэтага корпуса.
Туарэгі, якія вядуць у Малі ўзброеную барацьбу, — гэта вялікая этнічная група, якая паходзіць ад бербераў, карэннага этнасу Паўночнай Афрыкі. Традыцыйна яны былі качавымі жывёлаводамі. Туарэгі насяляюць велізарныя тэрыторыі афрыканскага кантынента ў некалькіх краінах, што ахопліваюць Сахару і прасціраюцца ад паўднёва-заходняй Лівіі да паўднёвых раёнаў Алжыра, Нігера, Малі і Буркіна-Фасо, аж да паўночнай часткі Нігерыі. Іх традыцыйная сацыяльная структура з’яўляецца кланавай і прадугледжвае каставую іерархію.
Сёння туарэгі з’яўляюцца напаўкачавым народам, які вызнае іслам. Дзякуючы ім гэта рэлігія распаўсюдзілася ў Паўночнай Афрыцы і рэгіёне Сахель, што прасціраецца ад захаду да ўсходу Афрыкі на паўднёвай мяжы пустыні Сахара.
Следам за Арменіяй і Сірыяй Расія губляе Малі і ЦАР
У Малі знайшлі сетку турмаў «Вагнера» з сотнямі зняволеных
Паўстанцы-туарэгі пасля знішчэння атрада вагнераўцаў зняліся з украінскім сцягам ФОТАФАКТ
ГУР Украіны прызнала дачыненне да ліквідацыі калоны вагнераўцаў у Малі
У Малі ў засадзе туарэгаў загінулі больш за 80 байцоў ПВК «Вагнер»
Прарасійскі рэгіён Афрыкі, дзе забілі вагнераўцаў, аб'яднаўся ў канфедэрацыю. Дзеля чаго?
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам4444
Каментары