Губарэвіч спрабуе ўзяць Бабарыку на слабо: «Ёсць апасенні, што не атрымаецца пераадолець прахадны бар’ер на выбарах у КР?»
Віктар Бабарыка заявіў, што не будзе ўдзельнічаць у выбарах у Каардынацыйную раду, як не будзе ўдзельнічаць і аргкамітэт ягонай партыі «Разам». Юрась Губарэвіч пракаментаваў аргументы былога банкіра.
Не ведаю, хто фармаваў пазіцыю партыі «Разам» адносна няўдзелу ў выбарах у Каардынацыйную Раду. Але ў прадстаўленым выглядзе яна не вытрымлівае ніякай крытыкі.
«Неабходна змяніць прынцыпы фармавання і ўзаемадзеяння ўсіх інстытуцыйных органаў дэмакратычных сіл…» — прапанова цікавая, хаця і не новая. Аднак ці не прасцей гэта зрабіць, з’яўляючыся часткай працэсу?
Каардынацыйная Рада з’яўляецца адным з трох падпісантаў Пратакола аб узаемадзеянні ОСТ — АПК — КР. Атрымлівайце заўважную колькасць месцаў у КР, стаўце пытанне аб пераглядзе Пратакола.
Не разумею, як гэта можна рабіць звонку. Хіба што запісацца ў шэрагі маргіналізаваных груп, якія крытыкуюць, але рэальна не здольныя ні на што паўплываць.
«Мы спрабавалі перанесці дадзеныя выбары на восень…» — вось тут, калі ласка, падрабязней. Як спрабавалі? Наколькі ведаю, ніводнага афіцыйнага звароту да Каардынацыйнай Рады не паступала. Таксама не было і публічных заяваў.
Увогуле, практыка пераносу даты выбараў пад патрэбы аднаго з дзясяткаў палітычных суб’ектаў з’яўляецца заганнай, бо парушаецца асноватворны прынцып: перыядычнасць і прадказальнасць выбарчых працэсаў, базавы дэмакратычны прынцып, які не павінен залежаць ад гатоўнасці асобных арганізацый.
І нават калі дапусціць перанос выбараў, застаецца адкрытым пытанне: ці гарантавала б гэта ўдзел партыі «Разам», калі за 6 папярэдніх гадоў не была сфармаваная адпаведная арганізацыйная база?
«Партыя «Разам» … дзейнічае ў інтарэсах беларускага народа і сваіх членаў.»
А тут у чым праблемы? Ёсць апасенні, што не хопіць членаў для фармавання выбарчага спісу і інтарэсы беларускага народа з 2020 года настолькі змяніліся, што не атрымаецца пераадолець прахадны бар’ер на выбарах у Каардынацыйную Раду?
«На дадзены момант мы не бачым магчымасці сапраўды забяспечыць эфектыўнасць КР і мэтазгоднасць сваёй дзейнасці ў яго рамках». З улікам вышэй пералічанага, гэта найбольш зразумелы і лагічны пункт заявы. З такім стаўленнем да разумення ролі дэмакратычных інстытуцый і формаў ўдзелу ў палітычным жыцці партыі «Разам» прынесці дадатковую вартасць сапраўды будзе складана.
Каментары
Бабарыка і Ко, вы не Ўстаў камерцыйнай арганізацыі ўкладаеце. Вызначыцеся, вы за інтарэсы народа ці за інтарэсы членаў сваёй партыі. Толькі далёкі ад палітыкі чалавек можа думаць, што магчымае 100% -вае адначасовае спалучэнне інтарэсаў усіх ва ўсіх сітуацыях.