Дальнабойшчыкі зарабляюць шмат, але калі ідуць на пенсію або па крэдыт, то выяўляецца, што не ўсё так радасна

Па факце больш, чым на паперы

Дзясяткі тысяч беларусаў працуюць дальнабойшчыкамі ў краінах ЕС, у асноўным у Польшчы (каля 55 тысяч) і ў Літве (каля 20 тысяч).

Пачаткоўцы, як правіла, атрымліваюць па 85 еўра за суткі працы, больш дасведчаныя — каля 95—100 еўра. Больш маюць кіроўцы аўтавозаў — каля 120—130 еўра за суткі.

Часцей за ўсё яны працуюць кадэнцыямі па 4—6 тыдняў, пасля чаго маюць адпачынак на 2—3 тыдні. Атрымліваецца, што за год такі кіроўца працуе 8 месяцаў, а 4 — адпачывае.

Адпаведна, пры заробку 100 еўра за суткі такі кіроўца атрымае за год 24 тысячы еўра, што адпавядае сярэднемесячнай зарплаце ў 2000 еўра. Гэта прыкметна больш за сярэднюю зарплату ў Польшчы або Літве.

Здавалася б, што пры такіх заробках «на рукі» чалавек мог бы разлічваць на добрую пенсію і вялікую максімальную суму крэдыту. Але гэта не зусім так. Рэч у тым, што з гэтых 2000 еўра часцяком зарплата складае толькі каля паловы ад агульнай сумы, а ўсё астатняе — гэта камандзіровачныя.

Мінімальны заробак = мінімальная пенсія

Праз гэта беларус, які каля 20 гадоў адпрацаваў у Польшчы кіроўцам-дальнабойшчыкам, пры выхадзе на пенсію быў моцна расчараваны яе сумай. Мужчына кажа, што ніколі не паглыбляўся ў пытанні бухгалтэрыі, таму разлічваў на вялікую пенсію, бо атрымліваў высокую зарплату.

«У выніку атрымаў мінімальную пенсію, бо і зарплата ў мяне ўвесь час, аказваецца, была каля мінімальнай», — кажа мужчына, які атрымлівае крыху больш за 400 еўра пенсіі.

Суразмоўца, які цяпер працуе ў польскай фірме і атрымлівае па 95 еўра за суткі працы, прызнаецца, што згодна з працоўным кантрактам ягоная зарплата складае 5000 злотых брута — гэта 3740 злотых на рукі (каля 870 еўра).

Павялічыць

«Гэта мая зарплата, якая мне раз на месяц прыходзіць на картку. Усё астатняе даплочваюць ужо па вяртанні з кадэнцыі», — кажа кіроўца.

Аналагічная сітуацыя і ў суразмоўцы, які працуе ў Літве. Мужчына кажа, што мае 100 еўра сутачных, але менавіта зарплата ў яго крыху большая за 1000 еўра, а ўсё астатняе — гэта камандзіровачныя, якія таксама прыходзяць на карту.

Банк адмовіў у іпатэцы

Кіроўца, які пасля працы ў Літве перайшоў на працу ў Польшчу, бо ягоная сям'я вырашыла пераехаць туды жыць, кажа, што ў Літве афіцыйна атрымліваў каля мінімальнай зарплаты і на такія самыя ўмовы ўладкаваўся ў Польшчы.

«Калі выбіраеш жыць у Еўропе, то варта звяртаць на гэта ўвагу, бо ад гэтага залежыць не толькі пенсія, але і, напрыклад, максімальны памер іпатэкі. Сам сутыкнуўся з такой праблемай, калі хацеў узяць крэдыт на кватэру, бо нібыта высокая зарплата для банка з'яўляецца нізкай», — тлумачыць дальнабойшчык.

Павялічыць

У выніку мужчыне крэдыт не ўхвалілі, таму ён быў вымушаны шукаць новае месца працы, дзе разлік ідзе больш празрысты і банк будзе бачыць не палову зарплаты, а ўсю.

Што да працадаўцаў, то работнікі з трэціх краін для іх выглядаюць больш выгаднымі за тых, хто жыве ўнутры той жа Польшчы або Літвы, бо замежнікі, як правіла, не звяртаюць увагу на такія акалічнасці: для іх важнейшая фактычная сума заробку.

Працадаўцу нашмат выгадней афіцыйна плаціць мінімум, а ўсё даплочваць асобна, бо тыя грошы ўжо не абкладаюцца падаткамі і іншымі абавязковымі адлічэннямі.

• 3
• 0
• 3
• 2
• 1
• 0
• 1
• 0