Dalnabojščyki zarablajuć šmat, ale kali iduć na piensiju abo pa kredyt, to vyjaŭlajecca, što nie ŭsio tak radasna
Biełaruskija dalnabojščyki, jakija pracujuć u Jeŭropie, zarablajuć sapraŭdy hodna, ale jość niuans.
Pa fakcie bolš, čym na papiery
Dziasiatki tysiač biełarusaŭ pracujuć dalnabojščykami ŭ krainach ES, u asnoŭnym u Polščy (kala 55 tysiač) i ŭ Litvie (kala 20 tysiač).
Pačatkoŭcy, jak praviła, atrymlivajuć pa 85 jeŭra za sutki pracy, bolš daśviedčanyja — kala 95—100 jeŭra. Bolš majuć kiroŭcy aŭtavozaŭ — kala 120—130 jeŭra za sutki.
Čaściej za ŭsio jany pracujuć kadencyjami pa 4—6 tydniaŭ, paśla čaho majuć adpačynak na 2—3 tydni. Atrymlivajecca, što za hod taki kiroŭca pracuje 8 miesiacaŭ, a 4 — adpačyvaje.
Adpaviedna, pry zarobku 100 jeŭra za sutki taki kiroŭca atrymaje za hod 24 tysiačy jeŭra, što adpaviadaje siaredniemiesiačnaj zarpłacie ŭ 2000 jeŭra. Heta prykmietna bolš za siaredniuju zarpłatu ŭ Polščy abo Litvie.
Zdavałasia b, što pry takich zarobkach «na ruki» čałaviek moh by raźličvać na dobruju piensiju i vialikuju maksimalnuju sumu kredytu. Ale heta nie zusim tak. Reč u tym, što z hetych 2000 jeŭra čaściakom zarpłata składaje tolki kala pałovy ad ahulnaj sumy, a ŭsio astatniaje — heta kamandzirovačnyja.
Minimalny zarobak = minimalnaja piensija
Praz heta biełarus, jaki kala 20 hadoŭ adpracavaŭ u Polščy kiroŭcam-dalnabojščykam, pry vychadzie na piensiju byŭ mocna rasčaravany jaje sumaj. Mužčyna kaža, što nikoli nie pahłyblaŭsia ŭ pytańni buchhałteryi, tamu raźličvaŭ na vialikuju piensiju, bo atrymlivaŭ vysokuju zarpłatu.
«U vyniku atrymaŭ minimalnuju piensiju, bo i zarpłata ŭ mianie ŭvieś čas, akazvajecca, była kala minimalnaj», — kaža mužčyna, jaki atrymlivaje krychu bolš za 400 jeŭra piensii.
Surazmoŭca, jaki ciapier pracuje ŭ polskaj firmie i atrymlivaje pa 95 jeŭra za sutki pracy, pryznajecca, što zhodna z pracoŭnym kantraktam jahonaja zarpłata składaje 5000 złotych bruta — heta 3740 złotych na ruki (kala 870 jeŭra).
«Heta maja zarpłata, jakaja mnie raz na miesiac prychodzić na kartku. Usio astatniaje dapłočvajuć užo pa viartańni z kadencyi», — kaža kiroŭca.
Anałahičnaja situacyja i ŭ surazmoŭcy, jaki pracuje ŭ Litvie. Mužčyna kaža, što maje 100 jeŭra sutačnych, ale mienavita zarpłata ŭ jaho krychu bolšaja za 1000 jeŭra, a ŭsio astatniaje — heta kamandzirovačnyja, jakija taksama prychodziać na kartu.
Bank admoviŭ u ipatecy
Kiroŭca, jaki paśla pracy ŭ Litvie pierajšoŭ na pracu ŭ Polšču, bo jahonaja siamja vyrašyła pierajechać tudy žyć, kaža, što ŭ Litvie aficyjna atrymlivaŭ kala minimalnaj zarpłaty i na takija samyja ŭmovy ŭładkavaŭsia ŭ Polščy.
«Kali vybiraješ žyć u Jeŭropie, to varta źviartać na heta ŭvahu, bo ad hetaha zaležyć nie tolki piensija, ale i, naprykład, maksimalny pamier ipateki. Sam sutyknuŭsia z takoj prablemaj, kali chacieŭ uziać kredyt na kvateru, bo nibyta vysokaja zarpłata dla banka źjaŭlajecca nizkaj», — tłumačyć dalnabojščyk.
U vyniku mužčynie kredyt nie ŭchvalili, tamu jon byŭ vymušany šukać novaje miesca pracy, dzie raźlik idzie bolš prazrysty i bank budzie bačyć nie pałovu zarpłaty, a ŭsiu.
Što da pracadaŭcaŭ, to rabotniki z trecich krain dla ich vyhladajuć bolš vyhadnymi za tych, chto žyvie ŭnutry toj ža Polščy abo Litvy, bo zamiežniki, jak praviła, nie źviartajuć uvahu na takija akaličnaści: dla ich važniejšaja faktyčnaja suma zarobku.
Pracadaŭcu našmat vyhadniej aficyjna płacić minimum, a ŭsio dapłočvać asobna, bo tyja hrošy ŭžo nie abkładajucca padatkami i inšymi abaviazkovymi adličeńniami.
«U siarednim kiroŭca aŭtavoza atrymlivaje 130 jeŭra za sutki». Dalnabojščyk ź Viciebska apisaŭ svaju pracu
«Nie raju na Rasiju iści: ja spaŭ ad siły pa try hadziny za sutki». Dalnabojščyki paraŭnoŭvajuć zarobki i ŭmovy pracy ŭ Jeŭropie i Rasii
Dalnabojščyk z Bresta za kantrabandu ŭ 3,5 miljonaŭ dalaraŭ sieŭ u turmu ŭ Vialikabrytanii
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary