Hetaja amierykanskaja aktrysa zdymałasia ŭ papularnych padletkavych kamiedyjach 2000-ch. Ale ciapier jaje nie paznać

Amanda Bajns naradziłasia 3 krasavika 1986 hoda ŭ Kalifornii ŭ siamji stamatołaha i miedycynskaj asistentki. Jana była małodšaj z troch dziaciej.

Viadomaść pryjšła da jaje jašče ŭ padletkavym uzroście — dziakujučy šou All That i ŭłasnaj prahramie The Amanda Show na kanale Nickelodeon. Nieŭzabavie Amanda stała adnoj z samych papularnych maładych telezorak ZŠA.

U 2000‑ia aktrysa paśpiachova pierajšła ŭ vialikaje kino. Jana atrymała šyrokuju viadomaść dziakujučy rolam u filmach «Čaho choča dziaŭčyna» (What a Girl Wants, 2003), «Jana — chłopiec» (She's the Man, 2006), «Łak dla vałasoŭ» (Hairspray, 2007) i «Vydatnica lohkich pavodzin» (Easy A, 2010).

Pavialičyć

U 2006 hodzie časopis Teen People uklučyŭ Amandu Bajns u śpis 25 samych pryvabnych maładych znakamitaściaŭ va ŭzroście da 25 hadoŭ. A ŭžo ŭ nastupnym hodzie vydańnie Forbes adznačyła jaje ŭ rejtynhu piaci samych vysokaapłatnych zorak da 21 hoda, acaniŭšy hadavy dachod aktrysy ŭ 2,5 miljona dołaraŭ.

Ale ŭ 2010 hodzie Amanda niečakana abviaściła pra sychod z kino. Paźniej stała zrazumieła, što za hetym stajali surjoznyja asabistyja prablemy. Bajns usio čaściej źjaŭlałasia ŭ navinach nie z-za premjer, a praź incydenty z zakonam i prablemy ź psichičnym zdaroŭjem. U 2013 hodzie paśla šerahu kryzisaŭ jana była špitalizavanaja.

Tady ž pa rašeńni suda dziaŭčyna apynułasia pad apiekaj: kantrol nad finansami i častkaj žyćciovych rašeńniaŭ ažyćciaŭlała jaje maci. U 2022 hodzie apieka była skasavanaja.

Što zdaryłasia?

U 2018 hodzie Amanda dała vialikaje intervju časopisu Paper. Jana pryznałasia, što jašče padčas zdymak u filmie «Łak dla vałasoŭ» pačała ŭžyvać aderał — preparat, jaki vykarystoŭvajecca dla lačeńnia sindromu deficytu ŭvahi i hipieraktyŭnaści (SDVH), a taksama narkalepsii (razładu snu). Pavodle słoŭ aktrysy, u niejkim časopisie jana pračytała, što aderał prymajuć žančyny, kab zastavacca chudymi. Imitujučy simptomy SDVH, jana źviarnułasia da psichijatra i atrymała recept.

Aktrysa zhadvaje, što ŭžyvała preparat žmieniami, i heta paŭpłyvała na jaje pavodziny na zdymačnaj placoŭcy filma «Tydzień biasšlubnaści» (Hall Pass) viasnoj 2010 hoda. Jana była raśsiejanaja, nie mahła zasiarodzicca na svaich replikach i zapomnić ich. U vyniku karcinu vypuścili bieź jaje ŭdziełu. Da taho ž joj zusim nie padabaŭsia jaje źniešni vyhlad.

Paśla sychodu z akciorskaj prafiesii, pavodle słoŭ Bajns, jana adčuła siabie zhublenaj, bo admoviłasia ad spravy, jakoj faktyčna pryśviaciła ŭsio žyćcio.

«U mianie było šmat volnaha času, ja pračynałasia, adrazu ŭžyvała marychuanu i litaralna zastavałasia pad jaje ŭździejańniem uvieś dzień», — kazała jana.

Prykładna ŭ toj ža pieryjad, pavodle jaje słoŭ, jana pačała «mieć znosiny z bolš sumnieŭnaj kampanijaj i mocna izalavałasia… Ja vielmi ŭciahnułasia ŭ užyvańnie narkotykaŭ, i heta stała dla mianie vielmi ciomnym i sumnym śvietam».

Toj etap svajho žyćcia jana apisvaje tak: «Ja prosta siadzieła doma, była pad kajfam, hladzieła televizar i pisała ŭ tvitary».

U listapadzie 2018 hoda Amanda paviedamiła žurnalistam, što adznačyła čatyry hady ćviarozaści, padkreśliŭšy, što značnaj častkaj svajho pośpiechu abaviazanaja padtrymcy i kłopatu baćkoŭ. Adnak, jak i ŭ mnohich inšych, jaje šlach da adnaŭleńnia nie byŭ roŭnym.

U studzieni 2019 hoda jana znoŭ źviarnułasia ŭ reabilitacyjny centr paśla recydyvu, vyklikanaha stresam. Prablemy ź psichičnym zdaroŭjem praciahvalisia i paźniej.

Bajns šukała siabie ŭ roznych śfierach. U 2019 hodzie jana zaviaršyła navučańnie ŭ Fashion Institute of Design & Merchandising (FIDM) u Łos-Andželesie i płanavała raźvivacca ŭ śfiery mody.

U 2023 hodzie Bajns zapuściła padkast Amanda Bynes & Paul Sieminski, ale prajekt spyniŭsia paśla pieršaha epizodu. Paźniej jana tłumačyła, što choča atrymać licenziju manikiurščycy i mieć bolš stabilnuju pracu pa-za industryjaj zabaŭ.

Pavialičyć

U kastryčniku 2024 hoda jana razam z dyzajnieram Ostynam Bebitam (Asspizza) vypuściła kapsulnuju liniju adzieńnia — futbołku i šorty z ułasnym art-dyzajnam. U śniežni taho ž hoda Bajns źjaviłasia na časovaj vystavie-prezientacyi kalekcyi ŭ Łos-Andželesie — heta byŭ jaje pieršy publičny vychad za bolš čym dziesiać hadoŭ.

Čym žyvie ciapier

Za apošnija hady źniešnaść aktrysy istotna źmianiłasia — novyja pryčoski, tatuiroŭki (u tym liku na tvary), ekśpierymienty sa stylem. Dla mnohich, chto pamiataje jaje pa rolach 2000-ch, siońniašni vobraz Bajns vyhladaje zusim inakš.

Bajns viadzie davoli zakryty ład žyćcia i redka źjaŭlajecca na publicy. Čas ad času jana dzielicca navinami ŭ sacyjalnych sietkach i, pavodle ŭłasnych słoŭ, imkniecca zasiarodzicca na zdaroŭi i asabistaj stabilnaści.

U 2023 hodzie Bajns paviedamiła ŭ sacyjalnych sietkach, što zrabiła blefarapłastyku, bo chacieła palepšyć samaacenku. U 2024 hodzie jana padzialiłasia ŭ instahramie, što nabrała vahu na fonie prablem ź psichičnym zdaroŭjem i pryjomu lekaŭ. Pavodle jaje słoŭ, heta paŭpłyvała na samaadčuvańnie i ŭpeŭnienaść u sabie.

U krasaviku 2025 hoda Amanda stvaryła staronku na OnlyFans, padkreślivajučy, što vykarystoŭvaje jaje dla znosin z prychilnikami, a nie dla pravakacyjnaha kantentu.

U červieni taho ž hoda jana ŭ storyz svajho instahram-akaŭnta raskazała, što pačała vykarystoŭvać preparat Ozempic dla źnižeńnia vahi.

«Ja zaraz važu 173 funty (78 kiłahramaŭ) i spadziajusia skinuć prykładna da 130 (59 kiłahramaŭ), što było b cudoŭna, kab ja lepš vyhladała na fotazdymkach paparacy», — napisała jana.

Pavialičyć

U studzieni 2026 hoda Bajns namiaknuła na mahčymy novy kirunak — muzyčnuju vytvorčaść. U instahramie aktrysa apublikavała frahmient kampazicyi ŭ žanry elektronnaj tancavalnaj muzyki, stvoranaj razam ź siabrami.

Pavialičyć

• 2
• 1
• 1
• 3
• 3
• 15
• 0
• 0