Ціханоўская прызналася, што мала чым можа памагчы беларусам у Грузіі
Грузінскія ўлады абяцалі не дэпартаваць беларускіх грамадзян назад у Беларусь, паведаміла Святлана Ціханоўская падчас слуханняў у Варшаве 7 лютага ў Каардынацыйнай радзе. Але гэта бадай і ўсё, чаго на гэтым кірунку беларускім дэмакратычным сілам удалося дабіцца, піша «Позірк».
Дэлегатка Каардынацыйнай рады Марына Зялёная, якая жыве ў Грузіі, адзначыла, што за апошні час было пададзена як мінімум 86 заяў на атрыманне міжнароднай абароны, але ніводная з іх не атрымала станоўчага адказу. Некаторыя справы ўжо разглядаюцца ў судах па правах чалавека. Зялёная цікавілася, што робіцца Офісам Ціханоўскай і Аб'яднаным пераходным кабінетам для беларусаў у Грузіі, асабліва тых, у каго скончыўся тэрмін дзеяння пашпарта.
Ціханоўская адказала, што раней, калі ўлады ў Грузіі былі іншымі, адносіны складваліся добра, абмяркоўваліся пытанні дапамогі беларусам і наладжвалася супрацоўніцтва. З цяперашнім урадам адносіны «практычна адсутнічаюць»: запыты і просьбы не разглядаюцца, міжнародных сустрэч не адбываецца. Па словах дэмакратычнай лідаркі, сітуацыя для беларусаў у Грузіі складаная, і краіна стала «болем беларускіх дэмакратычных сіл на міжнароднай арэне».
Адзінае, што ўдалося атрымаць ад цяперашняга грузінскага ўрада, — гэта ўскоснае абяцанне, што беларусаў не будуць дэпартаваць назад у Беларусь. Аднак механізмаў для абнаўлення пратэрмінаванага беларускага пашпарта ў Грузіі няма, таксама ўлады не даюць прытулку беларускім грамадзянам. У экстранных сітуацыях можна, аднак, спрабаваць эвакуяваць людзей дзякуючы дапамозе праваабаронцаў і фондаў салідарнасці.
Ціханоўская рэкамендуе тым, у каго яшчэ дзейнічае пашпарт, разгледзець магчымасць пераезду ў іншыя краіны, хоць бы нават у Арменію, дзе сітуацыя з камунікацыяй з урадам цяпер лепшая.
Грузія дзякуючы безвізаваму рэжыму і спрыяльным умовам знаходжання была адной з асноўных краін, куды пасля рэпрэсій у Беларусі эмігравалі людзі, якія ўдзельнічалі ў масавых акцыях пратэсту пасля прэзідэнцкіх выбараў 2020 года. Цяпер беларусы могуць знаходзіцца ў Грузіі на працягу года без перапынку, пасля чаго, каб «абнуляць» тэрмін знаходжання, неабходна пакінуць краіну на любы перыяд. Вярнуцца назад, аднак, могуць не ўсе, і перш за ўсё ў зоне рызыкі тыя, хто праяўляе публічную палітычную актыўнасць.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары