Паводле вынікаў апытання, праведзенага ў шэрагу еўрапейскіх краін, больш за палову жыхароў Еўропы ўспрымаюць Дональда Трампа як ворага Еўропы. Даследаванне было арганізавана пасля яго заяў і пагроз узяць пад кантроль Грэнландыю, піша «Еўрапейская праўда».
Апытанне ахапіла сем краін і было праведзена для парыжскай платформы Le Grand Continent, якая займаецца абмеркаваннем еўрапейскіх пытанняў.
51% рэспандэнтаў назвалі прэзідэнта ЗША «ворагам», у той час як «сябрам» яго лічаць толькі 8%. Яшчэ 9% адзначылі, што ён для іх ні сябар, ні вораг, а 2% не змаглі адказаць.
Найбольш негатыўна да Трампа ставяцца ў Іспаніі і Даніі — у абедзвюх краінах 58% апытаных лічаць яго ворагам. У Бельгіі такую пазіцыю занялі 56% рэспандэнтаў. У Францыі і Германіі паказчыкі крыху ніжэйшыя — 55% і 53% адпаведна. У Італіі Трампа негатыўна ўспрымаюць 52% удзельнікаў апытання.
Асобна вылучаецца Польшча: там толькі 28% лічаць яго ворагам Еўропы, аднак і «сябрам» яго назвалі ўсяго 17% апытаных.
Акрамя таго, удзельнікаў апытання спыталі, наколькі, на іх думку, Трамп прытрымліваецца дэмакратычных прынцыпаў. Амаль палова — 44% — лічаць яго дыктатарам. Толькі 10% мяркуюць, што ён паважае дэмакратыю. У Францыі, Германіі, Іспаніі і Італіі гэтая ацэнка пагоршылася на 7 працэнтных пунктаў у параўнанні са снежнем. Нават у Польшчы толькі 13% рэспандэнтаў упэўненыя, што Трамп дзейнічае ў межах дэмакратычных нормаў.
Апытанне праводзілася з 13 па 19 студзеня — ужо пасля заяў Трампа пра намер усталяваць кантроль над Грэнландыяй.
Таксама адзначаецца, што ў Германіі большасць насельніцтва не давярае ЗША амаль так жа, як і Расіі: недавер да Амерыкі выказалі 76% немцаў, у той час як да Расіі — 83%. А ў Вялікабрытаніі амаль палова апытаных лічыць Дональда Трампа перашкодай на шляху да міру ва Украіне.
Каментары
Ну, а Трамп, с его деятельной энергией, конечно враг для таких.
Напэўна таму што палякі адчуваюць, што наступнай мішэнню для Расеі будуць яны. Таму іх не шакуе і не абурае, што Трамп літаральна прымусіў Еўропу пачаць нешта рабіць для абароны ўласнага кантыненту самастойна.