Патрацілі па $1000 на чалавека. Як сям'я беларусаў адпачыла ў Кыргызстане
Мінчанка Алена разам з сям'ёй у жніўні адпачыла ў Кыргызстане. На арандаваным аўто яны 10 дзён ездзілі па самых прыгожых месцах краіны. Што ўбачылі і колькі патрацілі, жанчына расказала Myfin.by.
«Калі хочацца паглядзець горныя азёры, лепш браць красовер»
Кыргызстан сям'я выбрала па дзвюх прычынах: па-першае, разглядалі толькі бязвізавыя кірункі, а па-другое, хацелі пабываць у новай краіне з прыгожай прыродай. На ўсю паездку на траіх планавалі выдаткаваць $3000.
З Масквы мінчукі прыляцелі ў сталіцу Бішкек, трохі паглядзелі горад і на наступны дзень адправіліся ў падарожжа. Пачалі з курортнага горада Чалпон-Ата, які знаходзіцца на беразе возера Ісык-Куль. Па дарозе заязджалі паглядзець на каньёны Кок-Майнок.
«Узялі напракат седан Kia Rio. Дзякуючы таму, што машына была на газе, атрымалася ашчадзіць. За 10 дзён выйшла каля $500, браніравалі за месяц. Хацелі зрабіць выбар на карысць больш высокіх аўтамабіляў і, адпаведна, з большай праходнасцю, але такіх ужо не заставалася. Для нашага маршруту ў цэлым хапіла невысокага аўто, але калі хочацца паглядзець горныя азёры, лепш браць красовер.
Як мы пераканаліся, браніраваць аўто трэба нашмат раней, чым за месяц».
У Чалпон-Аце вандроўнікі правялі тры дні, там у іх быў пляжны адпачынак на беразе Ісык-Куля, які ўваходзіць у 30 найбуйнейшых азёр свету.
Днём купаліся і загаралі, пасля ездзілі ў розныя цікавыя месцы.
«Наведалі гарачыя крыніцы — у Кыргызстане іх мноства, з'ездзілі ў музей петрогліфаў. У апошні дзень пабывалі ў Грыгор'еўскай цясніне і Сямёнаўскай цясніне — на іх трэба не менш, чым паўдня. Уезд у Грыгор'еўскую цясніну за трох чалавек і аўтамабіль каштаваў каля $5. У мясцовых там бізнэс: катанне на конях, фота з сокалам. Як толькі бачаць турыстаў, адразу атачаюць і прапануюць свае паслугі — гэта не вельмі нам падабалася.
У цясніне мноства юртаў, дзе можна паабедаць. Месца турыстычнае, таму цэннік немаленькі, але смачна і порцыі вялікія. У цэлым кыргызская кухня вельмі сытная і каларыйная».
«З платных забаў — катанне на конях і аслах. З бясплатных — зорнае неба»
Далей мінчукі паехалі ў горад Каракол, там было дзве начоўкі. Наведалі гарачыя крыніцы «Ак-Суу Кенч», адна гадзіна за дваіх дарослых і дзіця каштавала каля $12. У Чалпон-Аце кошт тэрмальных крыніц быў трошкі даражэйшым — каля $14.
З'ездзілі ў Джэты-Аагуз, што перакладаецца як «Цясніна сямі быкоў». Назва пайшла з-за чырвоных скал, якія здалёку падобныя на сем ляжачых на траве быкоў.
«Яшчэ наведалі гарналыжную базу, падняліся на гару 3040 метраў над узроўнем мора. Кошт пад'ёму на сям'ю нам абышоўся ў раёне $25. З Каракола паехалі ў Барксонскую цясніну, там вадаспады. Плаціць за ўезд было не трэба. Дарэчы, з усіх прыродных турыстычных месцаў, дзе мы былі, за ўезд бралі плату толькі ў Грыгор'еўскай цясніне».
Пераначавалі ў сяле Баканбаева, а раніцай паехалі паглядзець каньён «Казка» з пяску і каменю чырвонага колеру.
Да гэтага часу маршрут беларусаў будаваўся вакол возера Ісык-Куль, далей яны паехалі ў бок горнага возера Сон-Куль.
«Там юртавыя лагеры, месца турыстычнае, таму і цэны не маленькія. З платных забаў — катанне на конях і аслах. З бясплатных — страшэнна прыгожае зорнае неба. У нашым юртавым лагеры, акрамя нас, былі італьянцы, іспанцы і хлопец з Індыі. Сустракалі ўсіх рэстаранам у юрце.
На наступны дзень мы паехалі ў бок Бішкека, з якога назаўтра выляталі. Дарога ішла праз перавал «33 папугаі», заехалі на вадаспад. Па дарозе пераначавалі і на наступны дзень былі ўжо ў Бішкеку, адкуль паляцелі ў Маскву. Таксі з Бішкека ў аэрапорт каштавала $8».
Начлег у юрце па 56 еўра
Па харчаванні падарожнікі аддавалі перавагу мясцовым аўтэнтычным кавярням. Часта елі за $ 10‑20 на траіх, але здаралася і танней, і даражэй. Сняданкі ўсюды ўваходзілі ў кошт арэнды жылля, вячэру часам бралі ў гаспадароў за дадатковую плату.
Найбольш дарагім фінансавым пунктам стала дарога: «Ластаўка» да Масквы і пералёт у абодва бакі на траіх абышліся ў $1558. На другім месцы аказалася арэнда аўтамабіля, на трэцім — арэнда жылля: за 12 дзён аддалі $460. Дзесьці жылі ў хостэле і было цалкам камфортна, улічваючы, што патрэбен быў толькі начлег.
«Самым дарагім варыянтам жылля сталі апартаменты ў Чалпон-Аце, за тры ночы аддалі €220. Юрта на Сон-кулі каштавала 56 еўра за ноч, але калі выбірала, бачыла, што і па €100 ёсць. У суму ўваходзілі сняданак і вячэра. Кватэра ў Бішкеку — €35, у іншых месцах спыняліся ў хостэлах — у сярэднім па €30-35. Усюды было вельмі камфортна, а прыязныя гаспадары ўсё расказвалі і паказвалі».
І хоць адпачынак нельга назваць бюджэтным, Алена кажа, што яны засталіся вельмі задаволеныя: пабывалі ў каларытнай краіне з прыродай Швейцарыі і Альпаў, нацешыліся цудоўнымі відамі і набралі мноства ўражанняў. Таму лічаць, што выдаткаваныя сродкі цалкам апраўданыя.
Танна, бязвіз, прыгожа. Беларуска каталася на лыжах у Казахстане і Кыргызстане — і ёй вельмі спадабалася
«Цяпер у нас ёсць ідэя паехаць калі-небудзь у Паўночную Карэю». Беларусы расказалі пра свае незвычайныя падарожжы
У якія краіны беларусы могуць адправіцца на адпачынак без візы? Спіс вялікі, але ёсць нюансы
34‑гадовая беларуска памерла на адпачынку ў Кыргызстане. Яна была рэканструктаркай
Ад Занзібара да Кыргызстана. Дзе адпачываюць праўладныя спявачкі і прапагандысты
Каментары