56‑гадовы расійскі яхтсмен вярнуўся з кругасветкі і запісаўся на фронт, каб распрацоўваць дроны. І загінуў у першым штурме
Сябры наракаюць, што нават забраць яго цела з Харкаўскай вобласці неяк не атрымліваецца.
Z-рэпарцёр расійскай «Камсамольскай праўды» Грыгорый Кубацьян расказаў у тэлеграме пра гаротны лёс свайго сябра Міхаіла Галаванава, чыя гісторыя добра паказвае сітуацыю ў цяперашнім расійскім войску.
56‑гадовы яхтсмен Міхаіл Галаванаў вырашыў падпісаць кантракт з расійскім Мінабароны, каб распрацоўваць дроны і знішчаць украінцаў. Яму паабяцалі, што так і будзе. Але адразу адправілі ў штурмавікі.
«Міша быў ужо не малады, але любіў Расію, перажываў за яе і спадзяваўся дапамагчы краіне. Ён быў тэхнаром з інжынерным складам розуму. Хацеў распрацоўваць і збіраць дроны. Яму паабяцалі, што так і будзе. Але як толькі падпісаў кантракт, трапіў на палігон, а потым у штурмавую роту. Яго адправілі на заданне ў пасёлак Пясчанае, і праз некалькі дзён Мішы не стала: прыляцеў варожы дрон», — піша Кубацьян.
Міхаіл Галаванаў калісьці хадзіў разам з журналістам Кубацьянам на парусніку «Крузенштэрн» у Ісландыю, а ў 2020 годзе ўдзельнічаў у кругасветнай экспедыцыі на парусніку «Палада». Цяпер ён застаўся ў зямлі ў Харкаўскай вобласці Украіны. Цела вярнуць пакуль немагчыма.
«Да ўкраінцаў пытанняў няма, яны ворагі. У мяне ёсць пытанне да бацькоў-камандзіраў: навошта ж так?! Навошта чалавека ў 56 (!) гадоў адпраўляць на штурм, з якога ён не вернецца? Калі ён мог бы прыносіць карысць у тэхнічных пытаннях, у якіх выдатна разбіраўся! Гэта, вядома, пытанне рытарычнае. Адказваць не трэба», — перажывае журналіст.
Каментары