Газаперапрацоўчы завод у Арэнбургу спыніў прыём сыравіны з Казахстана пасля ўдару дронамі
Арэнбургскі газаперапрацоўчы завод спыніў прыём сырога газу з казахстанскага радовішча Карачаганак з-за аварыйнай сітуацыі, якая адбылася ў выніку атакі БПЛА, перадае Tengrinews.kz са спасылкай на прэс-службу Міністэрства энергетыкі Казахстана.
Паводле выдання, інфармацыя пра характар пашкоджанняў і тэрміны аднаўлення працы завода расійскім бокам пакуль не пададзена.
У прэс-службе Міністэрства энергетыкі Казахстана адзначылі, што «газазабеспячэнне Казахстана не закранута, газ унутраным спажыўцам падаецца ў штатным рэжыме, без якіх-небудзь абмежаванняў», пытанні, звязаныя з перапрацоўкай карачаганакскай сыравіны і магчымым уплывам на нафтаздабычу, знаходзяцца ў прапрацоўцы.
«Пра ацэнку патэнцыйных страт і далейшых дзеянняў будзе паведамлена дадаткова. Міністэрства энергетыкі трымае сітуацыю на кантролі і знаходзіцца ў пастаянным узаемадзеянні з расійскім бокам і аператарамі радовішча», — гаворыцца ў паведамленні.
Арэнбургскі газаперапрацоўчы завод — адно з найбуйнейшых прадпрыемстваў у Расіі, якое займаецца комплекснай перапрацоўкай прыроднага газу, уваходзіць у склад Арэнбургскага газаздабывальнага комплексу.
Завод мае важнае значэнне для Казахстана, паколькі займаецца ачысткай і перапрацоўкай значнай часткі сырога газу і кандэнсату, здабытага на буйным Карачаганакскім радовішчы. Прыпыненне працы АГПЗ, як правіла, патрабуе ад аператараў Карачаганака часовага скарачэння здабычы.
У ноч на 19 кастрычніка ўкраінскія беспілотнікі атакавалі Арэнбургскі газаперапрацоўчы завод. Паводле паведамлення губернатара вобласці Яўгена Сонцава, часткова пацярпела інфраструктура завода.
«Пацярпелых сярод супрацоўнікаў прадпрыемства няма. Пагрозы населенаму пункту аб'ект не нясе», — заявіў губернатар.
У Генштабе Украіны пацвердзілі ўдар па газаперапрацоўчым заводзе, а таксама па НПЗ у Самары.
Цяпер чытаюць
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый22
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы2424
Каментары
[Зрэдагавана]