Аперацыя расійскіх спецслужбаў, якая завяршылася выбухамі пасылак у Германіі, Вялікабрытаніі і Польшчы, павінна была прайсці на месяц раней, але сарвалася з-за таго, што выканаўца не знайшоў кватэру ў віленскай новабудоўлі, дзе былі пакінутыя выбуховыя прылады, гаворыцца ў расследаванні міжнароднай групы журналістаў. Каб пазбегнуць выбуху ў жылым доме, агентам, імаверна, завербаваным ГРУ, прыйшлося экстранна абясшкодзіць выбухоўку, пераказвае расследаванне «Агентство».
Учора стала вядома пра затрыманне ў Літве групы людзей, якія абвінавачваюцца ў арганізацыі падпалаў і выбухаў у Еўропе. Цяпер з'явіліся новыя падрабязнасці.
Каб даставіць выбуховыя прылады ў Літву, выкарыстоўваліся сувязі былога камандзіра савецкай падводнай лодкі К-387 Аляксандра Мірошнікава, гаворыцца ў расследаванні.
Выбуховыя прылады былі дастаўлены ў Вільню пад выглядам масажных падушак для шыі. Былы падначалены Мірошнікава на флоце Мікалай Загарадні па просьбе экс-камандзіра патэлефанаваў агульнаму знаёмаму Андрэю Бабураву (таксама ў мінулым камандаваў падлодкай, устанавіла «Агенцтва») і папрасіў адвезці ў Вільню пасылку, якая на той момант была ўжо дастаўлена ў Рыгу. Першапачаткова забраць пасылку павінны былі сваякі Мірошнікава, але яны не змаглі гэтага зрабіць.
У Латвію пасылка была адпраўлена з Нарвы 24 чэрвеня і прыбыла ў Рыгу як груз эстонскай лагістычнай кампаніі Omniva. Праз тры дні, 27 чэрвеня, знаёмы Бабурава Васіль Ковач з двума пляменнікамі забраў пасылку і адвёз яе ў Літву, гаворыцца ў расследаванні. Па словах Бабурава, ён не ведаў пра змесціва пасылкі.
У Вільні ўкраінец Вячаслаў Чабаненка, які правёў пяць гадоў у турме за згвалтаванне жонкі, даставіў пасылку ў кватэру ў доме на вуліцы Герулайчэ. Тут Чабаненка выкарыстаў змесціва пасылкі, каб устанавіць чатыры самаробныя бомбы сярод спартыўнага інвентара, сэкс-цацак і масажных падушак і пакласці выбуховае рэчыва, замаскіраванае пад цюбікі з касметыкай.
Забраць пакеты з пасылкамі павінен быў літовец Аляксандр Шурановас, але ён заблудзіўся ў новабудоўлі і не змог знайсці патрэбную кватэру, гаворыцца ў расследаванні.
«На шчасце, у віленскім жылым доме ніхто не пацярпеў», — піша LRT. Але Чабаненку прыйшлося экстранна вярнуцца ў кватэру і дэактываваць выбухоўку. Пакеты перавезлі на склады ў Каўнасе, гаворыцца ў расследаванні.
Некаторы час, паводле звестак спецслужбаў, пасылкі знаходзіліся ў розных краінах Еўропы, але 17 ліпеня Ковач і яго пляменнікі зноў адвезлі пасылку ў Літву. У Вільні выбуховыя прылады атрымаў і прывёў у дзеянне раней судзімы 27‑гадовы ўкраінец Уладзіслаў Дзеркавец, які затым перадаў пасылкі Шурановасу, гаворыцца ў расследаванні. Той, выкарыстоўваючы несапраўднае імя Ігара Пруднікаваса, адправіў дзве пасылкі ў Вялікабрытанію з цэнтра абслугоўвання кліентаў DHL каля Віленскага аэрапорта, а дзве іншыя — праз платформу DPD у Польшчу, паведамілі аўтары расследавання.
Першая пасылка загарэлася 20 ліпеня ў 5:45 раніцы ў аэрапорце Лейпцыга ў Германіі, другая — 21 ліпеня ў 02:15 раніцы ў прычэпе грузавіка пад Варшавай, трэцяя — 22 ліпеня ў 3:36 раніцы на складзе DHL у брытанскім Бірмінгеме. Чацвёртую пасылку ўдалося перахапіць Службе ўнутранай бяспекі Польшчы, супрацоўнікі якой знайшлі таймер і лёгкаўзгаральнае рэчыва ў масажнай падушцы.
Генпракуратура і Бюро крымінальнай паліцыі Літвы напярэдадні паведамілі пра ўстанаўленне групы асоб, якія арганізавалі і планавалі здзейсніць чатыры тэракты ў розных краінах Еўропы. Трох чалавек, у тым ліку былога падводніка Бабурава, аб'явілі ў міжнародны вышук.
Каментары
Мяркую, гэта новая тактыка ботаферм - перасоўваць фокус увагі ў такіх навінах з рэальнага злодзея - Расеі на Літву і Польшчу. Літва ў іх вінаватая, што з літвінізмам змагаецца, а Польшча, што межы закрыла. Пакрычалі, паабураліся, пра зло Расеі амаль не заўважылі.
І працуе ж, гледзячы па лайках пад закідамі ботаў (пад папярэдняй навіной).
Ніжэй "Такое сабе" піша з той жа метадычцы.
А гэты "О как" забыў перакласці нік на беларускую мову.