Rasijskija dyviersanty ledź nie ŭčynili vybuch u žyłym domie ŭ Vilni

Učora stała viadoma pra zatrymańnie ŭ Litvie hrupy ludziej, jakija abvinavačvajucca ŭ arhanizacyi padpałaŭ i vybuchaŭ u Jeŭropie. Ciapier źjavilisia novyja padrabiaznaści.

Kab dastavić vybuchovyja pryłady ŭ Litvu, vykarystoŭvalisia suviazi byłoha kamandzira savieckaj padvodnaj łodki K-387 Alaksandra Mirošnikava, havorycca ŭ rasśledavańni.

Vybuchovyja pryłady byli dastaŭleny ŭ Vilniu pad vyhladam masažnych padušak dla šyi. Były padnačaleny Mirošnikava na fłocie Mikałaj Zaharadni pa prośbie eks-kamandzira patelefanavaŭ ahulnamu znajomamu Andreju Baburavu (taksama ŭ minułym kamandavaŭ padłodkaj, ustanaviła «Ahienctva») i paprasiŭ advieźci ŭ Vilniu pasyłku, jakaja na toj momant była ŭžo dastaŭlena ŭ Ryhu. Pieršapačatkova zabrać pasyłku pavinny byli svajaki Mirošnikava, ale jany nie zmahli hetaha zrabić.

U Łatviju pasyłka była adpraŭlena z Narvy 24 červienia i prybyła ŭ Ryhu jak hruz estonskaj łahistyčnaj kampanii Omniva. Praz try dni, 27 červienia, znajomy Baburava Vasil Kovač z dvuma plamieńnikami zabraŭ pasyłku i advioz jaje ŭ Litvu, havorycca ŭ rasśledavańni. Pa słovach Baburava, jon nie viedaŭ pra źmieściva pasyłki.

U Vilni ŭkrainiec Viačasłaŭ Čabanienka, jaki pravioŭ piać hadoŭ u turmie za zhvałtavańnie žonki, dastaviŭ pasyłku ŭ kvateru ŭ domie na vulicy Hierułajče. Tut Čabanienka vykarystaŭ źmieściva pasyłki, kab ustanavić čatyry samarobnyja bomby siarod spartyŭnaha invientara, seks-cacak i masažnych padušak i pakłaści vybuchovaje rečyva, zamaskiravanaje pad ciubiki z kaśmietykaj.

Zabrać pakiety z pasyłkami pavinien byŭ litoviec Alaksandr Šuranovas, ale jon zabłudziŭsia ŭ novabudoŭli i nie zmoh znajści patrebnuju kvateru, havorycca ŭ rasśledavańni.

Pavialičyć

«Na ščaście, u vilenskim žyłym domie nichto nie paciarpieŭ», — piša LRT. Ale Čabanienku pryjšłosia ekstranna viarnucca ŭ kvateru i deaktyvavać vybuchoŭku. Pakiety pieravieźli na składy ŭ Kaŭnasie, havorycca ŭ rasśledavańni.

Niekatory čas, pavodle źviestak śpiecsłužbaŭ, pasyłki znachodzilisia ŭ roznych krainach Jeŭropy, ale 17 lipienia Kovač i jaho plamieńniki znoŭ advieźli pasyłku ŭ Litvu. U Vilni vybuchovyja pryłady atrymaŭ i pryvioŭ u dziejańnie raniej sudzimy 27‑hadovy ŭkrainiec Uładzisłaŭ Dzierkaviec, jaki zatym pieradaŭ pasyłki Šuranovasu, havorycca ŭ rasśledavańni. Toj, vykarystoŭvajučy niesapraŭdnaje imia Ihara Prudnikavasa, adpraviŭ dźvie pasyłki ŭ Vialikabrytaniju z centra absłuhoŭvańnia klijentaŭ DHL kala Vilenskaha aeraporta, a dźvie inšyja — praz płatformu DPD u Polšču, paviedamili aŭtary rasśledavańnia.

Pieršaja pasyłka zaharełasia 20 lipienia ŭ 5:45 ranicy ŭ aeraporcie Lejpcyha ŭ Hiermanii, druhaja — 21 lipienia ŭ 02:15 ranicy ŭ pryčepie hruzavika pad Varšavaj, treciaja — 22 lipienia ŭ 3:36 ranicy na składzie DHL u brytanskim Birminhiemie. Čaćviortuju pasyłku ŭdałosia pierachapić Słužbie ŭnutranaj biaśpieki Polščy, supracoŭniki jakoj znajšli tajmier i lohkaŭzharalnaje rečyva ŭ masažnaj padušcy.

Hienprakuratura i Biuro kryminalnaj palicyi Litvy napiaredadni paviedamili pra ŭstanaŭleńnie hrupy asob, jakija arhanizavali i płanavali ździejśnić čatyry terakty ŭ roznych krainach Jeŭropy. Troch čałaviek, u tym liku byłoha padvodnika Baburava, abjavili ŭ mižnarodny vyšuk.

• 3
• 0
• 1
• 2
• 2
• 0
• 11
• 0