У Лідзе перад Днём беларускага пісьменства, які пройдзе 6—7 верасня, паставілі два інтэрактыўныя арт-аб’екты — арыгінальныя лаўкі-пазлы, паведамляе Лідскі гісторыка-мастацкі музей.
«На гэтых лаўках можна не толькі пасядзець, але і сабраць мазаіку — карціны мясцовых мастакоў з фондаў музея і пейзажы Ліды розных гадоў, намаляваныя на паштоўках. Кожную дэталь можна круціць, змяняючы малюнак на лаўцы», — расказалі ў музеі.
Так, напрыклад, можна ўзнавіць карціну Гродзенскіх мастацкіх майстэрняў, заснаваную на літаграфіі Алаіза Місяровіча з малюнка Напалеона Орды «Над ракой Лідзеяй». На ёй намаляваны замак у пасляпаўднёвыя гадзіны, рака Лідзейка, Крыжаўзвіжанскі касцёл, будынак кармеліцкага манастыра, дарога са слупамі тэлеграфнай лініі.
Як растлумачылі спецыялісты, малюнак Орды дайшоў да нас у літаграфічнай апрацоўцы Місяровіча і мае значныя адступленні ад фартыфікацыйных асаблівасцяў замка. У фондах Лідскага гісторыка-мастацкага музея захоўваецца таксама аналагічная паштоўка.
З пазлаў паўстаюць карціны лідскіх мастакоў: архітэктурны пейзаж «Поўнач» Івана Красачкі з выявай начнога замка, нацюрморт «Півоні» Алены Гаўрык, карціна «Блакітнае жарабя» Вілена Сільвановіча. Мазаіку можна таксама сабраць у выглядзе паштовак пачатку ХХ стагоддзя з фондаў музея, на якіх размешчаныя віды Ліды стогадовай даўніны.
Адна з лавак размясцілася на пляцоўцы перад музеем, другая — у двары Лідскага замка.
Акрамя таго, да свята ў горадзе паставілі 25 арыгінальных лавак, створаных мясцовымі арганізацыямі. Яны размясціліся на бульвары Гедыміна. На сцяне раённай бібліятэкі імя Янкі Купалы з'явіўся мурал з партрэтам класіка беларускай літаратуры.
Каментары