14 жніўня Аляксандр Лукашэнка падпісаў указ аб пераразліку працоўных пенсій з 1 верасня. Згодна з інфармацыяй прэс-службы палітыка, выплаты ў сярэднім павялічацца на 5%.
Паводле папярэдняй ацэнкі Мінпрацы, сярэдні памер пенсіі па ўзросце ў верасні складзе каля 980 рублёў.
Велічыня павышэння будзе залежаць ад:
- працягласці працоўнага стажу і памеру заробку, які ўлічваецца пры разліку пенсіі,
- устаноўленых даплат да асноўнай пенсіі.
На вераснёўскія пенсійныя выплаты накіруюць каля 2,2 мільярда рублёў, з іх 107 мільёнаў — дадатковыя сродкі на павышэнне.
У Мінпрацы падлічылі, што ў параўнанні з вераснем 2024 года пенсіі вырастуць на 167 рублёў, або на 20,5% у гадавым выражэнні. Гэта ўжо другое павышэнне ў 2025 годзе: першае адбылося з 1 лютага і склала 10%.
Павышэнне закране ўсе віды працоўных пенсій — па ўзросце, за выслугу гадоў, па інваліднасці і ў сувязі са стратай кармільца. У Беларусі атрымальнікамі такіх пенсій з’яўляюцца больш за 2,3 мільёна чалавек.
Каментары