86-гадовая пенсіянерка ў Мінску прадыктавала махлярам ПІН-код і засталася без зберажэнняў
86-гадовая мінчанка засталася без усіх зберажэнняў пасля серыі званкоў ад тэлефонных махляроў. У якасці сцэнара падману ашуканцы выкарысталі схему падаўжэння дамовы на паслугі сувязі, паведамляе сталічная міліцыя.
Спачатку жанчыне патэлефанавалі ў месенджары і прадставіліся супрацоўнікамі аператара сувязі. Пад падставай падаўжэння дамовы зламыснікі выведалі ў пенсіянеркі яе персанальныя даныя.
Праз некаторы час паступіў другі званок — цяпер ужо ад супрацоўніка КДК. Ён напалохаў жанчыну тым, што нібыта яе даныя трапілі ў рукі махляроў і выкарыстоўваюцца ў злачынных схемах. Махляры пераканалі мінчанку перавесці ім 11 тысяч рублёў для «дэкларавання». Што яна і зрабіла.
Далей пенсіянерцы загадалі тэрмінова накіравацца ў банк. Там яна аформіла банкаўскую картку на сваё імя, унесла на рахунак каля 10 тысяч рублёў і, не падазраючы падману, надыктавала зламыснікам ПІН-код. Неўзабаве з рахунку былі спісаныя ўсе грошы.
Толькі пасля гэтага жанчына зразумела, што стала ахвярай махляроў, і звярнулася ў міліцыю. Агульная сума шкоды склала больш за 20 тысяч рублёў.
Заведзена крымінальная справа.
Цяпер чытаюць
Памятаеце фота з мускулістым беларусам, які ў 2020-м ішоў у счэпцы з амапаўцам? Цяпер ён здымаецца ў кіно ў Англіі1
Каментары
Каб махлярам было зручней рабаваць іх?