У 2024 годзе Польшча выдала беларусам на 41% менш першых ДНЖ і доўгатэрміновых віз
У 2024 годзе Польшча выдала грамадзянам Беларусі 151,1 тыс. першых дазволаў на знаходжанне (сюды ўваходзяць дазволы на жыццё і доўгатэрміновыя візы), вынікае са статыстыкі Еўрастата. Гэта на 41% менш, чым у 2023 годзе, і на 47% менш, чым у 2022-м, піша Most.
У статыстыку Еўрастата ўваходзяць упершыню выдадзеныя дазволы на знаходжанне. Акрамя ДНЖ, у ёй улічваюцца нацыянальныя доўгатэрміновыя візы (тыпу D), якія выдаюцца на тэрмін звыш 90 дзён. Упершыню выдадзенымі лічацца дазвольныя дакументы, калі паміж заканчэннем папярэдняга і выдачай новага прайшло больш за паўгода.
Усяго за 2024 год Польшча выдала першыя дазволы на знаходжанне 488,8 тыс. замежнікам. Гэта мінімальны паказчык за апошнія 10 гадоў, і ён амаль на чвэрць меншы, чым у 2023 годзе. У 2024 годзе 80,3 тыс.дазволаў (або 53,1% ад усіх выдадзеных) беларусы атрымалі на падставе працы, 4,1 тыс. (2,7%) — для вучобы, 2,1 тыс. (1,4%) — па сямейных абставінах, 64,5 тыс. (42,7%) — па іншых прычынах. Сюды могуць уваходзіць у тым ліку візы, атрыманыя па картах паляка.
У асноўным падзенне абумоўлена скарачэннем выдачы ДНЖ і віз менавіта беларусам. Усяго за год Польшча выдала на 153,9 тыс. дазволаў менш, чым у 2023 годзе, у тым ліку беларусы атрымалі на 104,5 тыс. дазволаў менш. Аднак такое падзенне адзначаецца на фоне высокай базы папярэдніх гадоў.
Для параўнання: украінцы атрымалі на 6% менш дазволаў на знаходжанне, чым у 2023 годзе, — 226,2 тыс.
У цэлым колькасць дазволаў, выдадзеных Польшчай замежнікам, скарачаецца з 2021 года — тады дазволы на знаходжанне атрымалі 967,3 тыс.чалавек.
Каментары
Але ж і відавочны трэнд урада Туска. Польша таксама закрываецца ад Беларусі і беларусаў. Аднак гэта не рэгіянальны трэнд, а можна казаць агульны. Усе наколькі могуць ускладняюць магчымасьць узаемаадносін з беларусамі. Усе проста - нас залічылі да рускіх і на тым кропка. Паколькі мы не загінулі УСЕ ДА АДНАГО у барацьбе з рэжымам і Масквой, і нават не пажадалі таго зрабіць, то нам сказалі - вас няма, вы ніхто, выкрэсліваем вас, чорная пляма на мапе.
Адкулі то "дазволы на жыццё"? Гучыць вельмі дзіўна ))