На польска-беларускай мяжы беларускім скаўтам перадалі Бэтлеемскі агонь міру ФОТЫ
Вечарам 17 снежня на тэрыторыі паміж Польшчай і Беларуссю, на прапускным пункце «Кузніца Беластоцкая — Брузгі», польскія скаўты перадалі беларускім калегам Бэтлеемскі агонь міру, паведамляе прэс-служба Гродзенскай дыяцэзіі.
Беларускія каталіцкія скаўты, як і кожны год, дастаўляюць агонь у Гродна. 18 снежня ў 17 гадзін ён будзе ўрачыста ўнесены ў кафедральны касцёл св. Францішка Ксаверыя.
Затым скаўты развозяць агонь па ўсёй краіне.
Сёлетняя акцыя перадачы Бэтлеемскага агню праходзіць пад дэвізам «Развівай дабро ў сабе»: гэта значыць, што, каб рабіць свет лепшым, трэба пачынаць з сябе, развіваючы ўласныя добрыя якасці і клапоцячыся аб добрых адносінах. Разам з перадачай Бэтлеемскага агню сімвалічна перадаецца пасланне міру, каб, падобна як ззяе гэты агонь, у свеце ззяла надзея, якую немагчыма пагасіць.
Акцыя перадачы Бэтлеемскага агню пачалася ў 1986 годзе ў Аўстрыі. Да яе далучыўся рух скаўтаў, з цягам часу яна распаўсюдзілася на іншыя краіны.
Бэтлеемскі агонь запальвае дзіця або падлетак ад адной з 15 нязгасных лампад, якія знаходзяцца ў гроце Нараджэння Пана ў Бэтлееме. Затым агонь спецыяльным авіярэйсам дастаўляюць у Аўстрыю, а адтуль у іншыя краіны.
Запаліць агонь, нягледзячы на ўзброены канфлікт на Блізкім Усходзе, удалося і сёлета: у пачатку лістапада гэта зрабіў адзінаццацігадовы Джэрыс Фадзі Хіер з сям’і хрысціян у Бэтлееме.
Затым у Аўстрыі агонь сустрэў трынаццацігадовы Флорыян Мітэр, які 19 лістапада перадаў яго на аўдыенцыі ў Ватыкане Льву XIV, — такім чынам той стаў чацвёртым (пасля Яна Паўла ІІ, Бэнэдыкта XVI і Францішка) Папам, якому перадалі гэты агонь.
У Беларусь Бэтлеемскі агонь першы раз быў афіцыйна дастаўлены ў 1998 г. Польскія скаўты, якія перадаюць яго беларускім, атрымліваюць агонь непасрэдна ў Вене. З 2008 года каталіцкія скаўты адыгрываюць асноўную ролю ў распаўсюджванні Бэтлеемскага агню ў Беларусі сярод парафій і ўстановаў.
Сёлета перадачай агню займаюцца скаўты з Віцебска, Гродна, Жодзіна, Івянца, Полацка і Мінска. Плануецца перадаць яго ў больш чым 150 рыма-каталіцкіх і грэка-каталіцкіх парафій.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне63
Каментары