На круізным караблі, які плыве да Канараў, здарылася ўспышка віруса, ад якога няма лекаў. Больш за тое, людзі з сімптомамі хваробы ёсць ужо ў шасці краінах, і ў сацсетках шырацца абмеркаванні, ці не новы гэта кавід. Задалі гэтае пытанне доктару, біяхіміку і малекулярнаму біёлагу Святлане Кабанавай.
Вірус, пра які ідзе гаворка, мае назву андэс. Гэта адзін з сямейства ортахантавірусаў, то-бок інфекцый, якія звычайна перадаюцца ад грызуноў да чалавека.
Святлана тлумачыць, як гэта адбываецца:
«Вірусныя часцінкі вылучаюцца ў заражаных грызуноў са слінай, фекаліямі ці мачой. Заражэнне чалавека можа адбыцца, калі ён спажывае ежу, што змяшчае экскрэменты інфікаваных жывёлаў, удыхае пыл з іх выдзяленнямі, ці калі такая жывёла яго кусае».
Андэс уяўляе асаблівую небяспеку, бо, як паведамляецца, ён можа перадавацца і ад чалавека да чалавека, а гэта палягчае яго распаўсюд. Ад гэтага віруса няма спецыфічнага лячэння або вакцын, медыкі могуць толькі падтрымаць арганізм, пакуль ён змагаецца. Смяротнасць ад андэсу можа дасягаць 40%.
Аднак андэс распаўсюджваецца зусім не так, як кавід.
«Пашырэнне кавіду перарасло ў пандэмію, таму што каранавірус перадаецца паветрана-кропельным чынам ад чалавека да чалавека. Схематычна гэта можна ўявіць так: адзін інфікаваны заражае вялікую колькасць людзей у кінатэатры, а потым кожны з іх заражае родных і калегаў на працы.
З кожным крокам заражэнняў будзе больш і больш, і ўрэшце іх будзе столькі, што сітуацыя стане непадкантрольнай. Гэта і ёсць пандэмія», — кажа Святлана.
У адрозненне ад кавіду, чалавек, інфікаваны хантавірусам, звычайна не перадае яго паветрана-кропельным чынам. Заражэнне ў такім выпадку адбываецца праз кантакт біялагічных вадкасцяў — напрыклад, калі кроў чалавека з вірусам трапіць у рану здаровага чалавека.
«Імавернасць такога заражэння ў параўнанні з кавідам нашмат меншая, таму перадумоў для ўзнікнення пандэміі хантавіруса няма. Тым не менш, калі заражэнне чалавека адбылося, трэба неадкладна звярнуцца да доктара, таму што захворванне можа працякаць цяжка», — расказвае навукоўка.
Што да сімптомаў заражэння, яны нагадваюць прыкметы грыпу. Гэта павышаная тэмпература, болі ў мускулах і суставах, галаўны боль, галавакружэнне, млоснасць або дыярэя.
«Наша Нiва» — бастыён беларушчыны
ПАДТРЫМАЦЬЦяпер чытаюць
Айцішнік і былы палітвязень Віктар Куўшынаў прадае за 850 тысяч еўра дом у Партугаліі, які пабудаваў паўтара года таму ФОТЫ10
Каментары