Na polska-biełaruskaj miažy biełaruskim skaŭtam pieradali Betlejemski ahoń miru FOTY
Viečaram 17 śniežnia na terytoryi pamiž Polščaj i Biełaruśsiu, na prapusknym punkcie «Kuźnica Biełastockaja — Bruzhi», polskija skaŭty pieradali biełaruskim kaleham Betlejemski ahoń miru, paviedamlaje pres-słužba Hrodzienskaj dyjacezii.
Biełaruskija katalickija skaŭty, jak i kožny hod, dastaŭlajuć ahoń u Hrodna. 18 śniežnia ŭ 17 hadzin jon budzie ŭračysta ŭniesieny ŭ kafiedralny kaścioł sv. Franciška Ksavieryja.
Zatym skaŭty razvoziać ahoń pa ŭsioj krainie.
Sioletniaja akcyja pieradačy Betlejemskaha ahniu prachodzić pad devizam «Raźvivaj dabro ŭ sabie»: heta značyć, što, kab rabić śviet lepšym, treba pačynać ź siabie, raźvivajučy ŭłasnyja dobryja jakaści i kłapociačysia ab dobrych adnosinach. Razam ź pieradačaj Betlejemskaha ahniu simvalična pieradajecca pasłańnie miru, kab, padobna jak źziaje hety ahoń, u śviecie źziała nadzieja, jakuju niemahčyma pahasić.
Akcyja pieradačy Betlejemskaha ahniu pačałasia ŭ 1986 hodzie ŭ Aŭstryi. Da jaje dałučyŭsia ruch skaŭtaŭ, ź ciaham času jana raspaŭsiudziłasia na inšyja krainy.
Betlejemski ahoń zapalvaje dzicia abo padletak ad adnoj z 15 niazhasnych łampad, jakija znachodziacca ŭ hrocie Naradžeńnia Pana ŭ Betlejemie. Zatym ahoń śpiecyjalnym avijarejsam dastaŭlajuć u Aŭstryju, a adtul u inšyja krainy.
Zapalić ahoń, niahledziačy na ŭzbrojeny kanflikt na Blizkim Uschodzie, udałosia i sioleta: u pačatku listapada heta zrabiŭ adzinaccacihadovy Džerys Fadzi Chijer ź siamji chryścijan u Betlejemie.
Zatym u Aŭstryi ahoń sustreŭ trynaccacihadovy Fłoryjan Miter, jaki 19 listapada pieradaŭ jaho na aŭdyjencyi ŭ Vatykanie Lvu XIV, — takim čynam toj staŭ čaćviortym (paśla Jana Paŭła II, Benedykta XVI i Franciška) Papam, jakomu pieradali hety ahoń.
U Biełaruś Betlejemski ahoń pieršy raz byŭ aficyjna dastaŭleny ŭ 1998 h. Polskija skaŭty, jakija pieradajuć jaho biełaruskim, atrymlivajuć ahoń niepasredna ŭ Vienie. Z 2008 hoda katalickija skaŭty adyhryvajuć asnoŭnuju rolu ŭ raspaŭsiudžvańni Betlejemskaha ahniu ŭ Biełarusi siarod parafij i ŭstanovaŭ.
Sioleta pieradačaj ahniu zajmajucca skaŭty ź Viciebska, Hrodna, Žodzina, Ivianca, Połacka i Minska. Płanujecca pieradać jaho ŭ bolš čym 150 ryma-katalickich i hreka-katalickich parafij.
-
Žurnalistka «Sputnika» źviartajecca da Łukašenki: jaje syn pastupiŭ u Vyšejšuju škołu ekanomiki ŭ Maskvie, a doma na jaho zaviali kryminałku
-
Były supracoŭnik «Bietery» zapisaŭ vialikaje videa pra heta anłajn-kazino. Ciapier u jaho prablemy ź milicyjaj
-
U Minsku raźvitalisia z paetam Uładzimiram Karyznam, aŭtaram słoŭ da ciapierašniaha dziaržaŭnaha himna Biełarusi
Kamientary