У чарзе на мяжы Польшчы з Беларуссю з'явіліся «жорыкі». Хто гэта і чаму іх не любяць?
Раней турыстаў на беларуска-польскай мяжы ўжо турбавалі «толікі» — людзі, якія бессаромна ўлазілі ў чаргу. Цяпер да іх далучыліся «жорыкі». BGmedia распавядае, хто гэта такія.
«Жорыкамі» у чатах па праходжанні беларуска-польскай мяжы назвалі людзей, што выязджаюць з Беларусі і разварочваюцца назад на КПП. Там яны фатаграфуюць сваё аўто ў чарзе і з'язджаюць у Польшчу па справах. А па вяртанні паказваюць, нібыта заўсёды чакалі на месцы.
У чаце адзін з кіроўцаў больш падрабязна патлумачыў, як працуе гэта «банда дзялкоў»:
«Адзін чалавек вісіць на тэлефоне проста каля шлагбаума і каардынуе другога, які дае сігнал кіроўцам машын, якія папярэдне заехалі на стаянку каля ўезду ў пункт пропуску.
І ў момант, калі павінен адкрыцца шлагбаум, змучаныя людзі, якія сумленна адстаялі суткі і больш у чарзе і якія страцілі рэакцыю, не паспяваюць адрэагаваць і прапускаюць нягоднікаў, якія без чаргі са стаянкі па камандзе другога дзялка ныраюць проста пад шлагбаум, ад 2-3 машын і да 10 адразу. Пакуль людзі ля шлагбаума пачынаюць цяміць, падонкі ўжо праскокваюць без чаргі», — расказаў ён.
Некаторыя карыстальнікі заўважылі, што часта ў такіх людзей ёсць свае машыны ў чарзе — калі іншым трэба хутчэй праехаць да шлагбаума, тыя машыны «тупяць», марудзяць і не даюць праехаць. У гэтыя момант дзялкі паспяваюць праскочыць без чаргі.
Беларусы з чата таксама прыдумалі, як змагацца з такімі прадпрымальнікамі. Кажуць, трэба фізічна не даваць ім праехаць, фатаграфаваць і выклікаць польскую паліцыю:
«Калі хочаце стаяць у чарзе крыху менш, то рабіце відэа тых, хто залазіць. Гэта актуальна ад павароту на Окшын і да шлагбаума [пункта пропуску «Тарэспаль»], там суцэльная лінія. Потым выклікайце паліцыю па нумары 478-149-210 і кажаце, што перасякаюць суцэльную лінію, называйце ўчастак ад Окшына да мяжы. Калі будзе ехаць паліцыя, падыходзьце да іх і паказвайце відэа, бо «толікі» падыходзяць першымі і кажуць, што той, хто выклікаў, ужо з'ехаў».
Цяпер чытаюць
Стала вядома пра арышт папулярнай мастачкі Аксаны Шаляпінай6
Каментары