Вы — працаголік і часта перапрацоўваеце? Навукоўцы высветлілі, як гэта змяняе мозг
Праца звыш 52 гадзін на тыдзень можа выклікаць не толькі стомленасць і раздражнёнасць — яна, паводле меркавання паўднёвакарэйскіх навукоўцаў, здольная прыводзіць да фізічных зменаў у мозгу.
Даследаванне, праведзенае вучонымі з Паўднёвай Карэі паказала, што пастаянны стрэс ад перапрацовак можа парушаць працу тых участкаў мозгу, што адказваюць за эмоцыі і мысленне. Пра гэта піша The Times.
Навукоўцы прааналізавалі стан мозгу 110 медыцынскіх работнікаў. З іх 32 чалавекі працавалі больш за 52 гадзіны на тыдзень, астатнія — менш. Даследаванне выявіла істотныя адрозненні ў структуры мозгу паміж гэтымі дзвюма групамі.
У людзей, схільных да перапрацовак, назіралася павелічэнне аб’ёму асобных участкаў мозгу — перадусім тых, што звязаныя з выканаўчымі функцыямі і рэгуляцыяй эмоцый.
Паводле аўтараў, павелічэнне аб’ёму мозгу само па сабе не абавязкова з’яўляецца негатыўным — такія змены могуць назірацца, напрыклад, падчас навучання або актыўнага авалодвання новымі навыкамі. Гэта можа сведчыць пра рост актыўнасці нейронаў або паляпшэнне кагнітыўных здольнасцяў.
Аднак у гэтым выпадку рост аб’ёму адбываўся ў тых участках мозгу, што асабліва адчувальныя да хранічнага стрэсу. Навукоўцы лічаць, што гаворка ідзе не пра развіццё мозгу, а пра яго спробу прыстасавацца да пастаяннай перагрузкі. Такая адаптацыя можа часова павышаць уважлівасць і эфектыўнасць, але пры адсутнасці належнага аднаўлення прыводзіць да стомленасці, эмацыйнай нестабільнасці і пагаршэння кагнітыўных функцый.
Раней было ўстаноўлена, што праца звыш 55 гадзін на тыдзень павышае рызыку інсульту на 33 % і ішэмічнай хваробы сэрца на 13 %. Новае даследаванне дапаўняе гэтую трывожную статыстыку звесткамі пра магчымыя структурныя змены ў мозгу.
Аўтары падкрэсліваюць, што пакуль высновы папярэднія: удзельнікі групы з перапрацоўкамі былі маладзейшыя і мелі вышэйшы ўзровень адукацыі, а значыць, маглі спачатку мець лепш развітыя ўчасткі мозгу. Гэта магло паўплываць на выбар прафесіі і схільнасць да працяглай працы.
Эксперты адзначаюць, што праца «ўносіць уклад у нарастаючае разуменне таго, што перапрацоўкі сур’ёзна ўплываюць на здароўе» і падкрэсліваюць неабходнасць далейшых даследаванняў з удзелам людзей розных прафесій.
З якога ўзросту пачынаюцца першыя збоі ў працы мозгу і як іх запаволіць? Вучоныя далі адказ
Чаму падлеткі-дзяўчаты часцей пакутуюць на дэпрэсію: вучоныя знайшлі магчымае тлумачэнне ў мозгу
Што менавіта адбываецца ў мозгу мужчыны падчас сэксу?
Некаторыя людзі пакідаюць у нашым мозгу ўнікальны хімічны след — навукоўцы. Вось што гэта мяняе
Цяпер чытаюць
У Познані гінеколаг выдаліў 24‑гадовай беларусцы матку і яечнікі без яе згоды. Яму пагражае да 20 гадоў турмы12
Каментары
что согласен быть президентом