Мексіка адхіліла просьбу адміністрацыі прэзідэнта ЗША Дональда Трампа дазволіць амерыканскаму вайсковаму самалёту, які дэпартуе з ЗША мігрантаў, прызямліцца ў краіне, паведамляе «Голас Амерыкі».
Замест гэтага вайсковыя самалёты Air Force C-17 здзейснілі два аналагічных рэйса ў Гватэмалу з прыкладна 80 мігрантамі ў кожным, паведамляе Reuters. Трэці самалёт у Мексіку так і не вылецеў з ЗША, сцвярджае NBC.
Паводле звестак мясцовых міграцыйных органаў і амбасады ЗША ў Гватэмале, у пятніцу, 24 студзеня, у Гватэмала-Сіці прызямліліся два вайсковыя самалёты з дэпартаванымі мігрантамі з Тусона (штат Арызона) і Эль-Паса (штат Тэхас), піша The New York Times. Амбасада ЗША ў Гватэмале не змагла пацвердзіць журналістам газеты, колькі яшчэ вайсковых самалётаў чакаецца для транспартавання дэпартаваных у краіну і ў якія тэрміны.
NBC News нагадвае, што адносіны паміж Мексікай і ЗША апынуліся ў цэнтры ўвагі пасля заяў прэзідэнта ЗША Трампа аб намеры ўстанавіць пошліну ў памеры 25%, улічваючы паток мігрантаў з краіны да амерыканскіх межаў. Паводле інфармацыі Associated Press, Мінабароны ЗША накіроўвае 1500 вайскоўцаў для аховы амерыкана-мексіканскай мяжы ў адпаведнасці з намерам прэзідэнта ЗША абвясціць надзвычайнае становішча на мяжы.
Міністэрства замежных спраў Мексікі ў сваёй заяве ўвечары ў пятніцу, 24 студзеня, заявіла, што краіна мае «вельмі добрыя адносіны» з ЗША і супрацоўнічае ў такіх пытаннях, як іміграцыя. «Калі гаворка ідзе пра рэпатрыяцыю, мы заўсёды ўспрымем прыбыццё мексіканцаў на нашу тэрыторыю з распасцёртымі абдымкамі», — заявілі ў міністэрстве. Пра адмову ў дазволе на пасадку самалётаў у паведамленні МЗС не згадана.
Раней Пентагон паведаміў, што ягоныя самалёты дэпартуюць 5000 мігрантаў, якія ў цяперашні час знаходзяцца пад вартай у Эль-Паса (Тэхас) і Сан-Дыега (Каліфорнія).
Цяпер чытаюць
Зорка брэйкдансу з Віцебска атрымаў 11 гадоў турмы ў Кітаі. Што здарылася?11
Каментары