Выявілася, што некаторыя фізічныя нагрузкі такія ж эфектыўныя, як віягра
Віягра і яе аналагі — папулярны сродак лекавання эрэктыльнай дысфункцыі. Аднак вучоныя даказалі, што існуе яшчэ адзін метад, які мае амаль такую ж эфектыўнасць.
Спецыялісты сцвярджаюць, што эрэктыльная дысфункцыя сустракаецца ў паловы мужчын, якім больш за 40 гадоў. А эпізадычна гэты разлад праяўляецца ў кожнага мужчыны пад уплывам абставін.
У залежнасці ад прычын існуюць розныя варыянты лячэння — ад псіхатэрапіі да хірургічнага ўмяшання. Часта выкарыстоўваюцца прэпараты з сілфенафілам, які ўтрымлівае і віягра.
Што афіцыйна не лічыцца метадам лекавання гэтага захворвання, дык гэта фізічныя практыкаванні.
Аднак апошнія даследаванні паказваюць, што амаль роўныя па эфектыўнасці віягры аэробныя практыкаванні. Гэта значыць такія, якія «разганяюць кроў»: бег на доўгія дыстанцыі, плаванне, бег на лыжах, каньках, язда на ровары — усё тое, дзе нагрузка сярэдняй інтэнсіўнасці, але працяглая, і прымушае сэрца працаваць інтэнсіўней, у выніку чаго кісларод лепш даходзіць да мышцаў.
Як піша Fitbook.de, да такой высновы прыйшлі амерыканскія вучоныя, якія правялі метааналіз вынікаў папярэдніх даследаванняў.
Даследчыкі выкарыстоўвалі статыстычныя метады, каб вывучыць, як аэробныя трэніроўкі або іх адсутнасць у кантрольных групах уплываюць на эрэктыльныя растройствы.
Для ацэнкі ступені захворвання вучоныя прымянілі міжнародны індэкс эрэктыльнай функцыі (IIEF-EF), які з'яўляецца апытальнікам, які дазваляе паставіць дыягназ эрэктыльнай дысфункцыі і вызначыць яе цяжар. Гэты індэкс мае шкалу ад 6 да 30 балаў, у якой больш высокае значэнне адпавядае лепшай эрэкцыі. Вынікі даследавання былі апублікаваны ў Journal of Sexual Medicine у 2023 годзе.
Праведзены аналіз паказаў, што аэробныя трэніроўкі прыводзяць да значнага паляпшэння IIEF-EF у параўнанні з кантрольнымі групамі людзей, якія іх не практыкуюць. Пры гэтым больш заўважным эфект быў у тых, хто меў больш нізкі індэкс і, адпаведна, больш цяжкую эрэктыльную дысфункцыю.
Так, калі ў мужчын з умеранай эрэктыльнай дысфункцыяй індэкс павысіўся на 3,3 бала, а ў тых, хто меў лёгкую ступень, — на 2,8 бала, то ў выпадку пацыентаў з цяжкай эрэктыльнай дысфункцыяй паляпшэнне адбылося на 4,9 бала.
Аўтары звяртаюць увагу, што сільфенафіл, які ўтрымліваецца ў віягры, у клінічных выпрабаваннях паказаў эфектыўнасць у паляпшэнні індэкса IIEF-EF як мінімум на 4 балы. Такім чынам, у крайніх выпадках лепш дапаможа менавіта таблетка.
Тым не менш, даследчыкі падкрэсліваюць, што рэгулярныя аэробныя трэніроўкі, якія паляпшаюць працу сардэчна-сасудзістай сістэмы, могуць быць эфектыўнай альтэрнатывай медыкаментознаму лячэнню, асабліва для мужчын з цяжкай эрэктыльнай дысфункцыяй (нізкім IIEF-EF-індэксам), а таксама тых, хто не можа ці не хоча прымаць лекі праз іх магчымыя пабочныя эфекты.
Цяпер чытаюць
«Я сказаў на відэа, што мяне не катуюць — на той момант гэта было праўдай. А праз дзве гадзіны мяне збілі». Украінскі журналіст два гады правёў у расійскім палоне — вось што ён перажыў1
Каментары