Вядоўцы вяселляў мусяць паспяшацца ў падатковую, каб не застацца без працы. Важныя змены для самазанятых і ІП з 1 кастрычніка
З 1 кастрычніка нельга будзе адкрыць ІП па шэрагу відаў дзейнасці, а некаторым самазанятым нельга будзе працаваць без рэгістрацыі індывідуальным прадпрымальнікам.
Пачынаючы з наступнага месяца, самазанятыя грамадзяне, якія вядуць святы і карпаратывы, больш не змогуць працягваць сваю дзейнасць без рэгістрацыі ў якасці ІП ці юрасобы. Тое самае тычыцца музыкаў, акцёраў і танцораў, якія выступаюць індывідуальна.
Адкрыць ІП па вышэй згаданых відах дзейнасці можна толькі да 1 кастрычніка 2024 года. Пры гэтым, працаваць у якасці ІП яны змогуць толькі да канца 2025 года. Каб працаваць далей (пачынаючы з 1.01.2026), трэба будзе зарэгістраваць юрыдычную асобу.
З новага пераліку відаў дзейнасці для ІП, які будзе дзейнічаць з 1 кастрычніка, выключаныя:
- 9001 — дзейнасць у сферы выканальніцкіх мастацтваў;
- 9002 — дзейнасць, якая спрыяе правядзенню культурна-відовішчных мерапрыемстваў.
Тыя ІП, чые віды дзейнасці не трапілі ў абноўлены спіс, змогуць працягваць працаваць як ІП толькі да 31.12.2025. Для працягу дзейнасці ім трэба будзе трансфармавацца ў юрыдычную асобу.
Паводле ацэнак падатковага ведамства, больш за 90 працэнтаў ІП трапілі ў абноўлены пералік па відах дзейнасці.
Па стане на 1 студзеня 2024 года ў Беларусі налічвалася 252 тысячы індывідуальных прадпрымальнікаў. Атрымліваецца, што змены закрануць каля 25 тысяч ІП па ўсёй краіне.
Каментары