Многія выбіраюць кароткі рэжым пральнай машыны, мяркуючы, што ён дазваляе зэканоміць час, электраэнергію і ваду. Аднак спецыялісты адзначаюць, што на практыцы такі рэжым не заўсёды аказваецца найбольш эканамічным. У шэрагу выпадкаў больш выгадным выбарам можа быць стандартная або эка-праграма.
Паколькі кароткая праграма пральнай машыны мае меншую працягласць, многія вераць, што яе выкарыстанне эканоміць ваду і электрычнасць, а значыць, і фінансы. Аднак, як даводзіць Focus.dе, такое меркаванне памылковае.
Рэч у тым, што падчас кароткага цыклу пральная машына павінна нагрэць ваду за значна меншы час. Менавіта награванне вады з'яўляецца адной з найбольш энергаёмістых частак працэсу мыцця, таму пры паскоранай працы расход электрычнасці можа павялічвацца.
Прадстаўнік Цэнтральнага саюза электратэхнічнай і электроннай прамысловасці Германіі Вернер Шольц параўноўвае гэты працэс з кіраваннем аўтамабілем. Паводле яго слоў, паездка на адлегласць 100 кіламетраў з хуткасцю 100 км/г патрабуе значна больш паліва, чым той жа шлях, пройдзены на хуткасці 50 км/г. Нягледзячы на тое, што другі варыянт займае больш часу, ён з’яўляецца больш эканамічным. Гэты ж прынцып працуе і ў выпадку з пральнымі машынамі.
Яшчэ адна праблема кароткай праграмы — яе эфектыўнасць пры моцных забруджваннях. За невялікі час пральны сродак не заўсёды паспявае поўнасцю падзейнічаць, таму плямы могуць застацца. Калі вопратку даводзіцца мыць паўторна, агульныя выдаткі электраэнергіі і вады становяцца яшчэ большымі.
На гэтым фоне спецыялісты раяць звярнуць увагу на эка-праграму. Хоць эка-рэжым займае больш часу, машына награвае ваду паступова, што патрабуе менш энергіі. Больш працяглы цыкл таксама дазваляе пральнаму сродку лепш выдаляць забруджванні нават пры ніжэйшай тэмпературы.
Сучасныя тэхналогіі дазволілі зрабіць эка-рэжым не нашмат даўжэйшым за звычайныя цыклы, захаваўшы пры гэтым яго галоўную перавагу. За кошт нізкай тэмпературы і больш працяглага ўздзеяння вады і сродкаў на тканіну машына забяспечвае выдатны вынік пры мінімальных энергазатратах. Такім чынам, доўгае мыццё становіцца выгаднейшым рашэннем як для сямейнага бюджэту, так і для захавання бытавой тэхнікі.
Каментары
Можна ехаць у 8ай перадачы 100км/г з абаротамі рухавіка каля 1200 ў хвіліну і можна ехаць у 3яй перадачы 50км/г з абаротамі рухавіка каля 2000 ў хвіліну.
Відавочна, другі выпадак патрабуе больш паліва.
Дробязь, а непрыемна))