У чорных буслоў у Беларусі стала выводзіцца больш птушанят. У чым прычына?
Беларускія арнітолагі адзначаюць прыкметнае павелічэнне колькасці птушанят у чорных буслоў — рэдкага віду, уключанага ў Чырвоную кнігу Беларусі. Пра тое, з чым гэта звязана, і як уплываюць на дэмаграфію чорных буслоў надвор'е і рацыён, гаворыць навуковы супрацоўнік НПЦ па біярэсурсах НАН Беларусі Павел Пакуль у інтэрв'ю расійскаму выданню Sputnik.
Чорны бусел засяляе ўсе тыпы лясоў Беларусі. У заказніку «Сярэдняя Прыпяць», размешчаным на поўдні краіны ў пойме Прыпяці, знаходзіцца адзін з ключавых пунктаў гнездавання, там адзначаецца найбольш высокая шчыльнасць птушак на еўрапейскім кантыненце — 25 пар на 100 квадратных кіламетраў.
Сезон кальцавання птушанят сёлета завершаны, і можна падвесці папярэднія вынікі. У 2024-м паспяховасць гнездавання чорнага бусла была беспрэцэдэнтна высокай.
«Сёлета паспяховымі былі 50% пар чорнага бусла, прычым упершыню за апошнія 10 гадоў у рацыёне харчавання птушанят з'явіліся земнаводныя ў дастатковай колькасці», — распавёў Павел Пакуль.
Паводле слоў спецыяліста, такі бэбі-бум здарыўся, у першую чаргу, у сувязі з тым, што дзякуючы ўмовам надвор'я палепшылася харчовая база птушак — з'явілася больш жаб, за якімі не трэба далёка лётаць, як за рыбай.
«Для беларускага чорнага бусла 2014-2019 гады былі дастаткова праблемнымі з-за засухі. У пойме Прыпяці земнаводныя нават не выходзілі на нераст. Палавая спеласць у жаб надыходзіць далёка не на першы год, таму аднаўленне папуляцыі займае значны час.
Як паказваюць запісы камер-пастак, буслы могуць збіраць корм проста пад гнёздамі. У засушлівыя гады чорным буслам стала немагчыма паляваць унізе, што прывяло да змены рацыёну харчавання і вымусіла лётаць па здабычу далёка, нават за 10 кіламетраў, каб злавіць рыбу», — расказаў суразмоўца агенцтва.
У 2019-2020 гадах крызіс у харчаванні чорнага бусла дасягнуў такога ўзроўню, што паспяхова размнажаліся толькі 10% ад усіх пар, якія гняздуюцца ў пойме Прыпяці. Складанасці ў здабычы ежы прымушаюць дарослых чорных буслоў надоўга пакідаць гняздо без нагляду. Гэта ўзмацняе прэсінг драпежнікаў на маладых буслоў.
Паводле слоў спецыяліста, засуха 2015 года ўдарыла па ўсіх, у тым ліку па арланах-белахвостах, якія панадзіліся рабіць налёты на гнёзды з маленькімі буслянятамі, пакуль іх бацькі лёталі на паляванне па рыбу.
«У якасці прыкладу: для белага бусла, які жыве калоніямі, драпежнікі не такія страшныя, бо ў калоніі любы дарослы бусел абароніць птушаня суседзяў. Ды і жыве белы бусел паблізу чалавека, куды буйныя драпежнікі, здольныя панесці бусляня, не залятаюць.
А ў чорнага бусла арэал — гэта лес, пары жывуць тэрытарыяльна, на вялікай адлегласці адна ад адной», — адзначыў арнітолаг.
Цяпер, паводле афіцыйных звестак, у Беларусі жыве ад 950 да 1300 пар чорнага бусла. Ён адносіцца да трэцяй катэгорыі Чырвонай кнігі Беларусі.
Пра што маўчыць Аляксей Францкевіч, якому Польшча закрыла ўезд на 10 гадоў67
Каментары