Парламент Грузіі прыняў законапраект аб «замежных агентах» у другім чытанні, пратэсты працягваюцца
Са 150 дэпутатаў грузінскага парламента за прыняцце закона, які апазіцыя называе «расійскім», прагаласавалі 83: усе дэпутаты кіроўнай партыі «Грузінская мара» і іх саюзніцы, партыі «Улада народа». Апазіцыя ўдзелу ў галасаванні не брала. Трэцяе чытанне папярэдне прызначанае на 17 траўня.
У ноч на 1 траўня паліцыя ўпершыню ўжыла супраць пратэстоўцаў вадамёты і гранаты са слёзатачывым газам. Пратэстоўцы звярталіся ў машыны хуткай дапамогі з траўмамі пасля жорсткіх затрыманняў і сутыкненняў з паліцыяй, 63 чалавекі затрыманыя.
Сёння адзін з парламентарыяў, старшыня апазіцыйнай партыі «Адзіны нацыянальны рух» Леван Хабеішвілі, прыйшоў на абмеркаванне закона з павязкамі на твары — яго збіла паліцыя на ўчарашнім мітынгу. Лекары зафіксавалі ў яго пералом костак носа і выбітыя пярэднія зубы. Паліцыя сцвярджае, што ён намагаўся перашкаджаць сілавікам.
Сёння ў Тбілісі выстройваліся чэргі па рэспіратары. Людзі куплялі сродкі абароны ад газу перад маючай адбыцца акцыяй супраць прыняцця закона. У фэйсбуку актывісты стварылі суполку, дзе людзі могуць дапамагчы з прыездам і жыллём пратэстоўцам з рэгіёнаў.
Рэгулярныя акцыі супраць закона аб «замежных агентах» працягваюцца з сярэдзіны красавіка. Улады Грузіі спрабуюць яго прыняць другі год запар, гэты закон параўноўваецца з аналагічным расійскім. Разам з апазіцыяй супраць прыняцця закона рашуча выступае прэзідэнтка Грузіі Саламе Зурабішвілі.
У Еўрапарламенце прапанавалі пазбавіць Грузію статусу кандыдата на ўступленне ў ЕС, калі парламент краіны ўхваліць гэтую норму. Пры гэтым прэм'ер-міністр Грузіі заявіў, што кіроўная партыя мае намер прыняць закон аб «замежных агентах» нягледзячы ні на што.
У Грузіі паліцыя ўжыла слёзатачывы газ і вадамёты на мітынгу супраць закона аб замежных агентах
Прэзідэнтка Грузіі паабяцала накласці вета на закон «аб замежных агентах»
У грузінскім парламенце падчас разгляду законапраекта аб замежных агентах здарылася жывая бойка ВІДЭА
У парламент Грузіі паўторна ўнеслі законапраект аб замежных агентах
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс6
Каментары