У Літве на мяжы з Беларуссю затрымалі першы аўтамабіль з расійскімі нумарамі. Цяпер так будуць рабіць заўсёды
11 сакавіка літоўскія мытнікі ў Медніках затрымалі першы легкавы аўтамабіль з рэгістрацыйнымі знакамі Расійскай Федэрацыі. Грамадзянін Малдовы ехаў на ім з Літвы ў Беларусь, піша Delfi.lt. Але з гэтага панядзелка такога рабіць нельга.
Інцыдэнт быў зарэгістраваны а 23-й гадзіне. На КПП у Медніках прыехаў аўтамабіль Audi Q7 з расійскімі нумарамі, які быў затрыманы. Высветлілася, што ўладальніца аўто — грамадзянка Расіі, а кіроўца, грамадзянін Малдовы, ехаў без яе.
Кіроўцу азнаёмілі з дзейнымі з 11 сакавіка 2024 года правіламі і інфармавалі, што яго чакае штраф і канфіскацыя аўтамабіля. Быў складзены пратакол аб адміністрацыйным правапарушэнні. Машына коштам 41 690 еўра затрыманая. Хутчэй за ўсё, яна будзе канфіскаваная і перададзеная для патрэб Украіны.
Рэч у тым, што з панядзелка ва ўсім Еўрасаюзе не павінна ўвогуле застацца аўтамабіляў з расійскімі нумарамі. Да 11 сакавіка зарэгістраваныя ў Расіі аўтамабілі павінны былі пакінуць яго тэрыторыю, а хто патрабаванне праігнаруе — тым штраф або канфіскацыя аўтамабіля. І хоць кіроўца кляўся, што гэтага не ведаў, але няведанне ад адказнасці не вызваляе.
Выключэнне прымяняецца толькі да грамадзян Расіі, якія кіруюцца на зарэгістраваных у Расіі транспартных сродках транзітам у Калінінградскую вобласць або з яе па спрошчаных транзітных дакументах. Аднак такі пераезд не можа доўжыцца больш за 24 гадзіны, і падчас праезду транзітам у транспартным сродку абавязкова павінен знаходзіцца яго ўладальнік.
Цяпер чытаюць
Каб не сядзець у Расіі за наркотыкі, малады даносчык з Ашмянаў запісаўся на фронт. Дый згінуў16
Каментары