У студзені—лістападзе аб’ём вытворчасці ў Беларусі знізіўся ў 6 з 9 галін прамысловасці
Паводле звестак Нацыянальнага статыстычнага камітэта, у студзені—лістападзе 2009 года ў Беларусі ў шасці з дзевяці галін прамысловасці знізіўся аб’ём вытворчасці.
Найбольшае падзенне аб’ёмаў вытворчасці адбылося ў машынабудаванні і металаапрацоўцы — на 26,5% у параўнанні з аналагічным леташнім перыядам, а таксама ў лясной, дрэваапрацоўчай і цэлюлозна‑папяровай прамысловасці — на 21,5%.
У прамысловасці будматэрыялаў зніжэнне склала 3,7%, чорнай металургіі — 5,2%, лёгкай прамысловасці — 10,1%, электраэнергетыцы — 12,3%.
У хімічнай і нафтахімічнай прамысловасці вытворчасць у студзені—лістападзе павялічылася на 32,9%, у паліўнай — на 9,1%, у харчовай — на 2,3%.
Белстат таксама абнародаваў звесткі па падгалінах. Найбольшы прырост прамвытворчасці за 11 месяцаў адбыўся ў хімічнай прамысловасці (на 42,7%), найбольшае падзенне — у аўтамабільным машынабудаванні (на 44,4%).
У цэлым па прамысловасці ў студзені—лістападзе аб’ём вытворчасці знізіўся на 3,7% у параўнанні з гэткім жа перыядам 2008 года і склаў 111 трлн. 852,7 млрд. рублёў. Аб’ём прамвытворчасці ў лістападзе ў адносінах да кастрычніка ўзрос на 0,1%.
Згодна з прагнозам сацыяльна‑эканамічнага развіцця на 2009 год аб’ём прамысловай прадукцыі павінен узрасці на 12,0%.
Каментары