Прэзідэнт Расіі Уладзімір Пуцін, выступаючы на пленарным паседжанні дыскусійнага клуба «Валдай», расказаў, што ў целах людзей, загінулых на самалёце разам з кіраўніком ПВК «Вагнер» Яўгенам Прыгожынам, нібыта былі выяўленыя фрагменты ручных гранат.
Паводле Пуціна, вонкавага ўздзеяння на самалёт не было, гэты факт нібыта ўстанавіў расійскі Следчы камітэт падчас расследавання.
«Мне кіраўнік Следчага камітэта дакладваў літаральна днямі: у целах загінулых пры авіякатастрофе выяўленыя фрагменты ручных гранат. Знешняга ўздзеяння на самалёт не было — гэта ўжо ўстаноўлены факт, вынік экспертызы, праведзенай Следчым камітэтам Расійскай Федэрацыі».
Таксама Пуцін падзяліўся з грамадскасцю тым, што ў офісе Прыгожына, маўляў, знайшлі какаін:
«На жаль, на наяўнасць алкаголю або наркатычных сродкаў у крыві загінулых экспертыза не праводзілася, хоць мы ведаем, што пасля вядомых падзей у кампаніі ў Пецярбургу ФСБ выявіла не толькі 10 млрд наяўнымі, але і 5 кг какаіну. На мой погляд, трэба было правесці такую экспертызу, але яна не была праведзеная».
Таксама Пуцін заявіў, што досвед ПВК «Вагнер» быў «каравым», бо ў краіне, маўляў, адсутнічала заканадаўства аб прыватных вайсковых кампаніях. І ён нібыта быў вельмі здзіўлены, калі даведаўся, што заробкі найміты з ПВК атрымлівалі наяўнымі грашыма.
Самалёт з Яўгенам Прыгожыным на борце разбіўся над Цвярской вобласцю Расіі 23 жніўня. Усяго ў авіякатастрофе над Валдаем загінулі 10 чалавек.
29 жніўня Прыгожына пахавалі ў Санкт-Пецярбургу на падкрэслена непрэстыжных могілках. Ні Пуціна, ні іншых прадстаўнікоў расійскай палітычнай эліты на пахаванні не было. Само пахаванне прайшло таемна.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»34
Каментары