Хунта Нігера патрабуе ад'езду французскага пасла, але Парыж не збіраецца падпарадкоўвацца путчыстам

Ваенная хунта ў Нігеры, якая прыйшла да ўлады шляхам перавароту ў канцы ліпеня, загадала паслу Францыі пакінуць краіну на працягу 48 гадзін, аднак Парыж заяўляе, што не мае намеру выконваць патрабаванні незаконных уладаў, піша Бі-бі-сі.

Вайскоўцы захапілі ўладу ў Нігеры, арыштаваўшы прэзідэнта краіны Махамеда Базума па абвінавачванні ў дзяржаўнай здрадзе і падрыве нацыянальнай бяспекі. З моманту перавароту ён утрымліваецца ў падвале прэзідэнцкага палаца.

Адным з патрабаванняў дэманстрантаў, якія падтрымалі пераварот, быў сыход Францыі з Нігера. Нігер — былая французская калонія і Францыя дагэтуль мае немалы ўплыў у гэтай краіне.

У апошняй заяве МЗС Нігера гаворыцца, што французскі пасол Сільвэн Ітэ ў пятніцу адмовіўся прыйсці на сустрэчу з міністрам замежных спраў краіны, у сувязі з чым нігерскія ўлады адклікалі яго акрэдытацыю.

Акрамя няяўкі Ітэ хунта таксама спасылаецца на «іншыя дзеянні французскага ўрада, якія супярэчаць інтарэсам Нігера».

У пятніцу ўвечары Міністэрства замежных спраў Францыі заявіла, што Парыж прыняў да ведама меркаванне хунты, але путчысты не маюць права вылучаць такія патрабаванні, бо не з'яўляюцца законнай уладай.

«Акрэдытацыя пасла выдаецца выключна законна абранымі ўладамі Нігера», — цытуе агенцтва AFP неназванай крыніцы ў МЗС Францыі.

Дзярждэпартамэнт ЗША таксама паведамляе, што, паводле іх інфармацыі, у Нігеры гучаць заклікі да ад'езду шэрагу супрацоўнікаў амерыканскай дыпмісіі, але афіцыйнага запыту Вашынгтон пакуль не атрымліваў.

Расія замест Францыі?

У пятніцу нігерскі ваенны ўрад таксама санкцыянаваў увод у краін войскаў суседніх Малі і Буркіна-Фасо, калі Нігеру спатрэбіцца абарона ў яго супрацьстаянні з шэрагам краін Заходняй Афрыкі, якія заклікаюць вярнуць да ўлады дэмакратычна абранага прэзідэнта Базума.

Ваенны пераварот моцна абвастрыў адносіны Нігера не толькі з краінамі Афрыкі, але і з Захадам. У выпадку з Францыяй яны дасягнулі крытычнага пункту.

На працягу дзесяцігоддзяў французскі кантынгент дапамагаў нігерыйскай арміі ў барацьбе супраць ісламістаў, якія вядуць актыўную дзейнасць у рэгіёне Сахель на захадзе афрыканскага кантынента.

У пачатку жніўня зрынуты прэзідэнт Базум праз калонку ў Washington Post заявіў, што цяпер увесь рэгіён можа аказацца пад уплывам Расіі ў асобе ПВК «Вагнер».

Паводле яго слоў, ваенная хунта Нігера, як і хунты суседніх Малі і Буркіна-Фасо, робіць стаўку на расійскіх наймітаў, якія, па задуме путчыстаў, павінны прыйсці на змену французам і амерыканцам, якія дагэтуль дапамагалі Нігеру.

Паводле даных заходніх разведак, атрады ПВК «Вагнер» сапраўды аказвалі садзейнічанне ваенным пераваротам у афрыканскіх краінах і значна ўмацавалі расійскі ўплыў на кантыненце ў апошнія гады.

Аднак цяпер, у святле магчымай гібелі стваральніка і лідара ПВК Яўгена Прыгожына і няяснай будучыні кампаніі, разлікі нігерскай хунты могуць не апраўдацца.

• 3
• 0
• 2
• 1
• 0
• 0
• 7
• 0