Усю ўсходнюю мяжу Польшчы будуць ахоўваць масіўныя назіральныя аэрастаты. Іх радары пакрываюць Гродна і Брэст
Расказваем, што яны могуць і дзе менавіта будуць размяшчацца.
Польшча збіраецца размясціць некалькі вялізных стацыянарных аэрастатаў назірання на ўсёй сваёй усходняй мяжы. Іх радары ахопяць да 100 кіламетраў тэрыторыі Беларусі і Украіны.
Пра гэта днямі паведаміў партал Polon.pl і іншыя польскія медыя са спасылкай на Мінабароны Польшчы.
Так, Польшча ў рамках праграмы «Барбара» збіраецца закупіць і размясціць чатыры амерыканскія разведвальныя аэрастаты ўздоўж усёй усходняй мяжы, чый радыус назірання закранае Калінінградскую вобласць Расіі, Украіну і Беларусь (радары аэрастатаў цалкам пакрыюць Гродна і Брэст).
«Польскае Мінабароны апублікавала карту з інфармацыяй аб патэнцыяльных месцах размяшчэння чатырох аэрастатаў назірання. Гэта наступныя гарады:
-
Седльцы (65 кіламетраў ад Брэста);
-
Элк (65 кіламетраў ад Сувалкскага калідора);
-
Ілава (88 кіламетраў ад Калінінградскай вобласці Расіі);
-
Ніска (173 кіламетры ад Львова).
Галоўная перавага новых аэрастатаў перад звычайнымі радарамі наземнага базавання і маленькімі беспілотнікамі — гэта магчымасць кругласутачна адсочваць любыя паветраныя аб'екты, якія ляцяць вельмі хутка альбо на малой вышыні (як гэта было раней у выпадках з расійскай ракетай з Украіны, а таксама з беспілотнікам і верталётамі з Беларусі)», — піша Polon.pl.
Магчымымі пастаўшчыкамі такіх аэрастатаў могуць выступіць амерыканская абаронная кампанія Lockheed Martin, а таксама кампаніі Textron, TCOM і Norththrop Grumman.
Як паведамляюць польскія эксперты, новыя аэрастаты змогуць аўтаномна знаходзіцца ў паветры ад тыдня да месяца (у залежнасці ад мадэлі), а таксама назіраць за тэрыторыяй радыусам да 300 кіламетраў. Апроч таго, яны могуць несці груз вагой ад 20-ці кілаграмаў да некалькіх тон у выглядзе зброі, сродкаў сувязі і гэтак далей, а таксама паднімацца на вышыню да чатырох кіламетраў.
Нагадаем, што праз пастаянныя спробы незаконнага перасячэння польска-беларускай мяжы і наяўнасць у Беларусі некалькіх тысяч наймітаў ПВК «Вагнер» Польшча пачала істотна павялічваць колькасць сваіх вайскоўцаў побач з Беларуссю і нават прапрацоўвае план поўнага закрыцця мяжы.
У дадатак да гэтага польскія ўлады выказалі жаданне размясціць у сябе амерыканскую ядзерную зброю ў адказ на размяшчэнне такой жа ў Беларусі з боку Расіі.
На Шры-Ланцы ў 37 гадоў памёр беларускі кінапрадзюсар Андрэй Маталыга3
Каментары