Азараў расказаў, што дыверсію ў Мачулішчах «Байпол» правёў разам з СБУ і пасля гэтага страціў фінансаванне
Аляксандр Азараў у інтэрв'ю блогерцы Таццяне Мартынавай расказаў, хто, апроч «Байпола», стаяў за аперацыяй у Мачулішчах і чаму пасля гэтага ў арганізацыі пачаліся праблемы.
Аляксандр Азараў кажа, што ў лютым у «Байпола» скончылася фінансаванне, яго не працягнулі.
«У лютым «Байпол» удзельнічаў у аперацыі па пашкоджанні самалёта А-50. Цяпер я ўжо магу сказаць, што гэта была аперацыя не толькі «Байпола» — мы аказвалі садзейнічанне СБУ, гэта была сумесная аперацыя. У той момант нам гаварыць нельга было», — распавёў Азараў.
Свае супярэчлівыя заявы ў дзень дыверсіі ён патлумачыў тым, што іх арганізацыя спачатку вырашыла не прызнаваць датычнасць да падрыву самалёта («бо правядзенне [такіх] акцый у Беларусі ўспрымаецца адмоўна сярод нашых партнёраў за мяжой»), але пасля перамоў з украінскімі партнёрамі вырашылі ўзяць адказнасць на сябе, не згадваючы ўкраінскі бок.
«І пасля гэтага ў нас пачаліся велізарныя праблемы. Фінансаванне цалкам было спынена. Нашы міжнародныя партнёры, донары, казалі «Аляксандр, ты малайчына» за вуглом, а калі выходзілі некуды пры грамадскасці — «Мы з вамі мець адносін не можам, усё, фінансавання больш у вас не будзе», — дзеліцца Азараў.
Па яго словах, праз адсутнасць фінансавання пачаліся праблемы і ў калектыве, бо людзі патрабавалі заробкі.
Вядучая стрыму спытала, ці праўда, што Азарава выклікалі польскія спецслужбы.
«Я не буду ўдакладняць, але скажу, што правядзенне акцый з тэрыторыі Польшчы на тэрыторыі Беларусі — гэта фактычна падрыхтоўка вайны замежнай дзяржавай, у гэтым выпадку Польшчай у Беларусі. Адпаведна любыя акцыі, якія плануюцца з Польшчы, Літвы, Латвіі на тэрыторыі Беларусі, забароненыя мясцовымі спецслужбамі, і правядзенне іх, мякка кажучы, не вітаецца», — адказаў былы сілавік.
Дыверсія на аэрадроме ў Мачулішчах адбылася 26 лютага. Быў пашкоджаны каштоўны расійскі самалёт-лакатар А-50, з якога ажыццяўлялася навядзенне ракет на цэлі ва Украіне. Аляксандр Азараў у той дзень заявіў, што гэта справа рук беларускіх партызанаў і што самалёт быў атакаваны двума дронамі. Ён таксама сцвярджаў, што ўсе выканаўцы ў бяспецы. Лукашэнкаўцы не паказвалі самалёт некалькі дзён, пазней апублікавалі вечаровыя кадры з ім, а пасля самалёт адправіўся на рамонт у расійскі Таганрог.
Пасля дыверсіі прайшлі шматлікія затрыманні: сілавікі паведамлялі пра больш за 20 арыштаваных беларусаў. Затрымалі таксама ўкраінца Мікалая Швяца і заявілі пра датычнасць СБУ да дыверсіі. Сілавікі трактавалі акцыю як акт тэрарызму.
Чытайце таксама:
«Байпол»: Самалёт ДРЛВ А-50 быў падарваны ў двух месцах, яны паказаныя на фотаНа АНТ выпусцілі фільм пра «сетку СБУ» ў Беларусі
Каго менавіта затрымалі ў вёсцы Чарцяж? Гэта сямейная пара, у іх двое дзяцей
Новыя падрабязнасці пра атаку на самалёт у Мачулішчах: прапагандысты назвалі новыя імёны
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары