«Гэта было маё развітальнае пасланне гораду». У Мінску затынкавалі яшчэ адзін мурал мастака Міці Післяка
У Мінску затынкавалі яшчэ адзін мурал мастака Міці Післяка Dama con l'ermellino («Дама з гарнастаем»), як даведаўся CityDog.io. Гэта апошняя праца Післяка перад эміграцыяй у Амерыку.
Малюнак Dama con l'ermellino з'явіўся ў 2019 годзе па адрасе вул. Чырвонаармейская, 22. Цяпер на ягоным месцы — жоўтая сцяна.
Летась у Мінску зафарбавалі мурал Still Life (вул. Чыгуначная, 31/1), які мастак стварыў яшчэ ў 2017 годзе падчас фестывалю Vulica Brazil.
Як расказаў Міця Післяк у каментары CityDog.io, «Дама з гарнастаем» — гэта ягоны апошні малюнак, зроблены перад ад'ездам у Амерыку.
«Я натхніўся працай Леанарда Да Вінчы «Дама з гарнастаем» і зрабіў сваю версію малюнка, дадаўшы некалькі дэталяў: тэлефон як сімвал існай рэальнасці і вечны спадарожнік чалавека, а яшчэ канверт з квітком на самалёт. Гэта было маё развітальнае пасланне гораду з сімваламі тых, хто пакідаў Мінск разам са мной: мая жонка (ужо былая) Наташа і трое нашых катоў».
Са слоў мастака, гэта праца была зробленая без узгаднення з адміністрацыяй раёна, і, як ён сам адзначае, яму вельмі прыемна, што амаль 4 гады існавала ў Мінску і камунальнікі яе не чапалі.
На пытанне, як Міця рэагуе на тое, што мурал усё ж такі затынкавалі, мастак адказаў, што вялікіх перажыванняў з гэтай нагоды ў яго няма.
«Знаходзячыся ў іншай краіне, складана блізка ўспрымаць тое, што адбываецца ў іншай частцы планеты. Стараюся думаць пра той момант, калі змагу вярнуцца ў Мінск і зрабіць што-небудзь яшчэ».
Чытайце таксама:
«Сяброў няма. Партнёркі таксама. Кантактую толькі з мамай». Чаму нам складана заводзіць сяброў і што з гэтым рабіць — тлумачыць псіхолаг
Цяпер чытаюць
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў38
Каментары