Генеральны сакратар беларускага Чырвонага Крыжа з'ездзіў у «ДНР» і папазіраваў там з Z
Расійскі рэсурс Sputnik паведаміў пра паездку генеральнага сакратара Беларускага таварыства Чырвонага Крыжа Дзмітрыя Шаўцова на акупаваныя тэрыторыі Украіны, у т. зв. «ДНР». Нейтральнасці ён там не трымаўся.
Прадстаўнік беларускага Чырвонага Крыжа гаварыў шчымлівыя словы пра дзяцей, якіх вывозілі з акупаваных тэрыторый у Беларусь:
«Калі прыязджаеш да іх дадому, разумееш, наколькі жудасна тое, што адбываецца цяпер. Самае крыўднае, што праз амбіцыі дарослых людзей губляецца дзяцінства ў нашых дзетак. Я не падзяляю беларускіх дзетак, дзяцей украінскіх і дзяцей Данбаса. Яны ўсе дзеці».
А вось бок у вайне ён затое займае самы што ні на ёсць выразны: на рукаве ў Дзмітрыя Шаўцова красуецца сімвал расійскай агрэсіі — лацінская літара Z.
Між тым у статуце Беларускага таварыства Чырвонага Крыжа чорным па белым напісана:
«Для таго, каб карыстацца даверам, рух не аддае перавагі ні адной з бакоў падчас ваенных дзеянняў і ніколі не ўмешваецца ў супярэчнасці палітычнага, расавага, рэлігійнага або ідэалагічнага характару».
Беларускае таварыства Чырвонага Крыжа — цалкам праўладная арганізацыя, якая безагаворачна падтрымлівае рэжым Лукашэнкі ва ўсіх яго дзеяннях як на словах, так і на справе. Сяброў гэтай арганізацыі, напрыклад, заўсёды ўключаюць у склад выбарчых камісій, і яны актыўна ўдзельнічаюць у фальсіфікацыі выбараў рознага ўзроўню. Старшыня Гомельскай абласной арганізацыі Беларускага таварыства Чырвонага Крыжа Ганна Смаляк нядаўна публічна падтрымала размяшчэнне ядзернай зброі ў Беларусі. Пра гэта яна заявіла ў эфіры гомельскага тэлебачання.
Цяпер чытаюць
«Калі мне прыляціць, я гатовая». Наста Рагатко — пра сэкс-сцэну ў сваёй кнізе, прарасійскіх сваякоў, Гаюн і Матольку27
Каментары