Ва Украіне афіцыйна абвясцілі пра стварэнне саюзу з Вялікабрытаніяй і Польшчай у імя бяспекі
Міністр замежных спраў Украіны Дмытро Кулеба заявіў пра стварэнне рэгіянальнага саюзу ў імя бяспекі з Вялікабрытаніяй і Польшчай, піша Радыё Свабода.
Фота: Украінская праўда.
«Сёння мы маем гонар і задавальненне паведаміць аб пачатку Украінай, Вялікабрытаніяй і Польшчай новага трохбаковага фармату супрацы», — заявіў Дмытро Кулеба 17 лютага ў Кіеве на супольным брыфінгу з міністаркай замежных спраў Вялікабрытаніі Ліз Трас, якая знаходзіцца ва Украіне з візітам.
Украінскі міністр удакладніў, што неўзабаве будзе выдадзена супольная заява кіраўнікоў знешнепалітычных ведамстваў трох краін.
«Вялікая Брытанія і Польшча будуць стаяць побач з украінскім народам у намаганнях дзеля абароны суверэнітэту і тэрытарыяльнай цэласнасці ў міжнародна прызнаных межах. Польшча і Вялікабрытанія будуць дапамагаць нам абараняць нашу дзяржаву. Таксама мы сканцэнтруем свае намаганні на трохбаковым фармаце ў эканамічнай, гандлёвай і энергетычнай супрацы і ў барацьбе з дэзынфармацыяй. Асобную ўвагу тры краіны будуць скіроўваць на падтрымку Крымскай платформы», — удакладніў Кулеба.
У сваю чаргу, Ліз Трас падкрэсліла, што Вялікабрытанія застаецца на баку Украіны і дапамагае ў сферы бяспекі і абароны. «Сёння я хачу абвясціць пра наступны кампанент нашай падтрымкі — павелічэнне фінансавай падтрымкі на 100 мільёнаў еўра. Таксама я радая, што сёння мы запускаем трохбаковае партнёрства з Украінай і Польшчай. Мы актывізуем нашу супрацу ў галіне бяспекі, санкцыйнай палітыкі і ў барацьбе з дэзынфармацыяй. Сёння Злучанае Каралеўства гатовае стаць побач з нашымі хаўруснікамі ў Цэнтральна-Усходняй Еўропе», — заявіла яна.
Стварэнне трохбаковага альянсу ў імя бяспекі анансавалі ў Кіеве на пачатку лютага, калі ва ўкраінскую сталіцу з адначасовым візітам прыбылі кіраўнікі ўрадаў Польшчы і Вялікабрытаніі Матэвуш Маравецкі і Борыс Джонсан. Падпісанне, як сцвярджаюць інфармаваныя крыніцы, тады не адбылося, бо Ліз Трас захварэла на каранавірус і скасавала свой візіт у Кіеў.
Чытайце таксама:
Польшча, Брытанія і Украіна ствараюць новы ваенна-палітычны саюз. Што пра яго вядома?
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы33
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары