Палітвязень з'явіўся ў эфіры праграмы «Маркаў. Нічога асабістага».
Ён заявіў, што прызнаў віну па артыкуле 342 (грубае парушэнне грамадскага парадку).
Апроч таго, расказаў пра чат, у якім адміністратары найбуйнейшых тэлеграм-каналаў абмяркоўвалі план акцый пратэсту.
«Можна сказаць, гэты чат «Хата», ён па-рознаму называўся, пераствараўся, меў розныя назвы. Галоўнае, было гэта ключавое слова «Хата». Там былі адміністратары найбуйнейшых каналаў, блогеры і гэтак далей. І менавіта там адбывалася сапраўды, гэта быў такі галоўны каардынацыйны чат вулічных пратэстаў і інфармацыйнага парадку», — расказаў Пратасевіч і назваў імёны людзей, якія нібыта ўваходзілі ў чат.
«Сцяпан Пуціла, Ян Рудзік пазней туды стаў уваходзіць, Тадэвуш Гічан, таксама туды ўваходзіў Франак Вячорка, які мог прыйсці туды і напісаць адразу канкрэтныя тэзісы, па якіх мы павінны былі працаваць. Антон Матолька, Даніла Багдановіч. Раней там прысутнічалі такія персанажы, як Шрайбман, Пальчыс, Юшкевіч, а таксама Настасся Рагатко, якая мае дачыненне да дзейнасці штаба Святланы Ціханоўскай, Вікторыя Пальчыс, жонка Эдуарда Пальчыса. Дзмітрый Навоша, у прынцыпе, дастаткова вядомы медыйны чалавек, Яўген Малахоўскі, які працаваў у асноўным з дваровымі чатамі і дваровымі ініцыятывамі. Там, у асноўным, і прымаліся ўсе асноўныя рашэнні аб тым, дзе пройдзе наступная акцыя, які мы павінны трымаць інфармацыйны парадак у найбліжэйшы час. Там абмяркоўваліся ўсе актуальныя падзеі, усе здарэнні. Па сутнасці, адзін чат выконваў ролю галоўнага каардынацыйнага чата ўсёй інфармацыйнай вайны і вулічных пратэстаў», — сцвярджае ён.
Згаданыя ім людзі пакуль ніяк не пракаментавалі фільм АНТ.
Пратасевіч шмат выказваўся ў тым ліку аб жыллёвых умовах і матэрыяльным стане некаторых апазіцыйных дзеячаў. Пры гэтым ён не раз са шкадаваннем адзначаў, гаворачы пра сваю супрацу ў розных каналах, што яго «адсунулі ў бок», «збіраліся звольніць» і г. д.
Каментары