Кастрычніцкі з’езд «Гавары праўду» прайшоў вельмі горача. Яго падрабязнасці даходзяць толькі цяпер.
Водгуллем таго з’езда стала тое, што арганізацыю пакінуў яе заснавальнік, былы палітвязень Сяргей Вазняк (ён заадно адзін з членаў ЦК партыі «Справядлівы свет»). У чым прычына скандалу? Вазняк не быў задаволены працай Таццяны Караткевіч у якасці сустаршыні «Гавары праўду», таму вылучыў сваю кандыдатуру.
На першым этапе з’езда ў верасні Андрэя Дзмітрыева пераабралі сустаршынёй, а вось ні Караткевіч, ні Вазняка не змаглі абраць, ніхто з іх не набраў большасці. У кастрычніку гэтае пытанне зноў ставілі на павестку з’езда, але дэлегаты прынялі рашэнне ўвогуле не галасаваць па сустаршынях, а прагаласаваць за «працягненне паўнамоцтваў ранейшых кіраўнікоў».
Вазняк лічыць, што тым самым парушаныя асновы дэмакратыі. У лісце, які ён разаслаў сябрам арганізацыі, ён не абірае словаў і называе Караткевіч «лукашысткай».
«Наша Ніва» спытала ў Вазняка пра яго пазіцыю.
«Так, Таццяна Караткевіч лукашыстка, бо яна спалохалася працэдуры галасавання. Для мяне гэта вельмі дзіўна. Тым больш, што Дзмітрыеў прайшоў працэдуру абрання. Калі мы за дэмакратыю, то павінны пачынаць з сябе. Гэта не дастойна для лідара арганізацыі — баяцца выбараў ва ўласнай арганізацыі.
Можна колькі заўгодна гнабіць Сталіна, але фармальна працэдуру абрання на з’ездах КПСС ён праходзіў. Хаця ён тыран, і я да яго ў цэлым негатыўна стаўлюся. Але фармальная працэдура была! Нават у Лукашэнкі такая працэдура ёсць раз на пяць гадоў. А тут узялі — і адмянілі! Людзі на з’ездзе проста стаміліся і прагаласавалі так, каб хутчэй разысціся.
Лідарам трэба не лічыцца, а ім быць, пацвярджаць гэта пастаянна, а не час ад часу. Караткевіч фармальна была кіраўніком ініцыятыўнай групы Дзмітрыева на выбарах 2020 года, але ў рэальнасці працу вялі іншыя людзі, у тым ліку і я. Я наўпрост казаў, што мяне не задавальняе, як Таццяна выконвае свае абавязкі сустаршыні. А то ў нас адзін робіць усё [Дзмітрыеў], а іншая — нешта час ад часу. Гэта не ідэалагічны канфлікт, мы аднолькава ўсё ацэньваем, проста рабочы момант.
Мой выхад з «Гавары праўду» з гэтым наўпрост не звязаны. Я ўжо казаў Андрэю Дзмітрыеву перад выбарамі прэзідэнта, што гэта ўжо мая апошняя кампанія, і я буду сыходзіць з кіраўнічых пасадаў. Трэба рыхтавацца да палітычнай пенсіі, я ўжо амаль 30 гадоў барацьбе аддаў. Я працягваю дапамагаць Андрэю Дзмітрыеву, але ў якасці валанцёра».
Іншы сустаршыня «Гавары праўду» Андрэй Дзмітрыеў так ацаніў канфлікт: «Шкада, што Сяргей прыняў такое рашэнне. Я лічу, што гэта эмацыйны і памылковы ўчынак. Мы ўсе цяпер на нервах — гэта жыццё. Для мяне каманда — гэта месца, дзе ёсць розныя меркаванні, але мы выслухоўваем адно аднаго і шукаем паразумення».
Сяргей Вазняк застаецца ў партыі «Справядлівы свет».
Цяпер чытаюць
Фоты з Масквы даюць пабачыць Пуціна і Лукашэнку без грыму11
Каментары