Украінец, нібыта завербаваны ў Беларусі, здаўся ў СБУ і назваў імя куратара
Грамадзянін Украіны, абвінавачаны ў «дзяржаўнай здрадзе і дапамозе прадстаўнікам замежнай дзяржавы ў правядзенні падрыўной дзейнасці супраць украінскай дзяржавы», пазбег крымінальнай адказнасці, бо добраахвотна звярнуўся ў Службу бяспекі і назваў імя свайго вербавальніка ў Беларусі, піша Радыё Свабода.
Справу, заведзеную паводле артыкула 111 Крымінальнага кодэксу Украіны аб дзяржаўнай здрадзе, калегія суддзяў Ратнаўскага раённага суда Валынскай вобласьці разглядала 7 жніўня. Абвінавачанаму грамадзяніну пагражала пазбаўленне волі на тэрмін ад 12 да 15 гадоў з канфіскацыяй або без канфіскацыі маёмасці.
Як вынікае з матэрыялаў крымінальнай справы, украінца ў другой палове кастрычніка 2017 года нібыта завербаваў супрацоўнік Упраўленьня фінансавых расследаванняў Камітэта дзяржаўнага кантролю Брэсцкай вобласьці Уладзіслаў Л..
Гэта адбылося ў Кобрыне, дзе ў той час знаходзіўся грамадзянін Украіны. Ён сцвярджае, што пагадзіўся на супрацу ў вуснай і пісьмовай форме, паабяцаўшы збіраць інфармацыю пра сістэму аховы дзяржаўнай мяжы Украіны і асабісты склад памежных падраздзяленняў на памежным участку Ратнаўскага раёна Валынскай вобласці.
На апошняй сустрэчы, якая адбылася сёлета 22 сакавіка, Уладзіслаў Л. нібыта паставіў перад украінцам яшчэ адно заданьне — сабраць і перадаць яму інфармацыю аб асабістым складзе супрацоўнікаў мясцовага тэрытарыяльнага падразьдзяленьня ўпраўленьня СБУ ў Валынскай вобласці.
Неўзабаве пасьля гэтай сустрэчы ўкраінец вырашыў звярнуцца ў СБУ і паведаміць аб сваім вербаваньні. Дзякуючы гэтаму яму ўдалося пазьбегнуць крымінальнай адказнасьці — ён пераканаў суд у тым, што не перадаваў вербавальніку сакрэтнай інфармацыі.
У Камітэце дзяржкантролю Беларусі пацвердзілі, што такі супрацоўнік у іх ёсць, але ад каментара, ці мог ён вербаваць украінскіх грамадзян, адмовіліся. З самім супрацоўнікам КДК, які нібыта вербаваў украінца, зьвязацца не ўдалося.
Гэта чацвёрты вядомы выпадак, калі ўкраінцаў нібыта вербавалі беларускія спецслужбы, і першы, калі называецца імя меркаванага вербавальніка.
Пасьля першых аналагічных гісторый у прэс-цэнтры Службы бяспекі Украіны Свабодзе заяўлялі, што такія факты фіксуюцца «амаль сістэматычна». Што праўда, пра іх ніколі не паведамляюць афіцыйна — усе яны сталі вядомыя пасля публікацыі судовых рашэньняў аб закрыцці крымінальных спраў супраць украінцаў, якія добраахвотна паведамілі СБУ пра сваё вербаванне.
Каментары