Галоўная ваенная пракуратура Генеральнай пракуратуры Украіны (ГПУ) паведаміла пра падазрэнні экс-міністру абароны Украіны за неналежнае выкананне службовых абавязкаў. Міхаіла Ежаля падазраюць у спробе незаконна прадаць Расійскай Федэрацыі бамбавікі.
Як паведамляе прэс-служба ГПУ, дапушчаная халатнасць мела месца пры ўзгадненні ў 2011 годзе пераліку ваеннай маёмасці Узброеных сіл Украіны, якая падлягае адчужэнню.
«У далейшым гэта рашэнне дазволіла Міністэрству абароны Украіны ажыццявіць неправамернае адчужэнне двух цяжкіх стратэгічных бамбавікоў ТУ-95МС суб'екту прадпрымальніцтва, якое пацягнула цяжкія наступствы ў выглядзе матэрыяльнай шкоды дзяржаве ў асабліва буйным памеры на суму больш за 24 мільёны грыўняў», — паведамляе ГПУ.
Падчас дасудовага расследавання выяўленае месцазнаходжанне бамбавікоў і іх камплектуючых, на іх накладзены арышт.
«Была прадухіленая далейшая рэалізацыя самалётаў і іх камплектуючых у Расійскую Федэрацыю», — адзначылі ў Генпракуратуры.
Міхаіл Ежаль быў прызначаны паслом у Беларусі 3 красавіка 2013 года ўказам Віктара Януковіча, які тады быў прэзідэнтам Украіны. Да гэтага займаў пасаду дарадцы прэзідэнта Украіны, у 2010-2012 гадах быў міністрам абароны, яшчэ раней — галоўнакамандуючым Ваенна-марскімі сіламі Узброеных сіл Украіны.
У жніўні 2014 года Генеральная пракуратура Украіны распачала супраць Міхаіла Ежаля больш за 50 крымінальных спраў за актыўны ўдзел у знішчэнні тылавога забеспячэння ўкраінскай арміі.
Цяпер чытаюць
Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?15
Каментары