Pryjemnaści BSSRaŭskich časoŭ dla mianie palahajuć vyklučna ŭ pryvatnaj sfery.
Samymi bolšymi ź ich była niadzielnaja prahrama «Ŭ haściach u kazki» dy ježa. Jakaja heta była ježa!
BSSRaŭskaja ježa na siońniašni hust padasca nia nadta raznastajnaju i ŭboha spakavanaju, ale ja baču jaje jak vializnuju haru vabnotaŭ i smačnotaŭ, aśvietlenuju jarkim soncam. Tak ja jaje i budu apisvać, z kučy vyciahvajučy, razhladajučy, niuchajučy j smakujučy.
Makravataja chałva pradavałasia ŭ kruhłych blašankach z vyjavaju vaviorački. U takich ža blašanačkach, tolki mienšych, pradavalisia manpanśje. Źjeŭšy źmieściva, blašanak nie vykidvali. Chłopčyki nasypali tudy piasku i vykarystoŭvali jak chakiejnyja šajby, dziaŭčatki zachoŭvali tam fanciki i «zołatka» (arkušyki folhi), mamy z babciami — huziki i ihołki, a taty — kručki, blešni, šrot, hajki, šrubki i ćvički, i ŭsie razam — miadzianyja kapiejki.
Maroziva było niekalki hatunkaŭ na ŭvieś SSSR. Najsmačniejšym i najdaražejšym byŭ leninhradzki plambir — 28 kap., leninhradzkaje eskimo (mrojny deficyt) — 22—25 kap., maroziva hlazuravanaje na pałačcy — 22 kapiejki, zvyčajnaje — 13 kap. Usio — u blakłych papierkach z vyjavami biełych miadźviedziaŭ, śniahurak, aleniaŭ, eskimosaŭ u kuchlankach.
Šakaladki padzialalisia na ŭłasna šakaladki j sałodkija plitki. Najsmačniejšyja z šakaladak (vialikich i małych) byli «Aŭrora» dy «Alonka» (vialikaja — rubiel sorak, małaja — 20 kap.), z sałodkich plitak — «Krakadził Hiena» dy «Viasiołyja rabiaty». Małaja vanilnaja šakaladka kaštavała kala 20 kapiejek.
Pierniki byli takija: «arystakraty» — pierniki ŭ šakaladnaj hlazury i «chamy» — biełavatyja, ablityja hlazuraj hadkaha smaku.
Kukuruznyja pałački byli hlazuravanyja (20—23 kap.) abo niehlazuravanyja (18 kap.). Apošnija — tolki ŭ krajnim razie!
Piečyva było niekalki hatunkaŭ (u pačačkach pa 12 kvadracikaŭ). Jak by hatunak ni nazyvaŭsia, smak byŭ adnolkavy.
Tašnociki — piaščotnaja nazva piražkoŭ z nakrypkaju za 5 kapiejek. Maje favaryty siarod tašnocikaŭ — z pavidłam.
A jašče ž byli bułački za 3 kapiejki!
Samyja papularnyja «limanady» byli «Krem-soda» j «Buracina» . Mienš papularny — «Zvanočak» . Nasamreč, naturalna, heta nie byli ani limanady, ani aranžady, ale padavałasia, što smačna.
Haziroŭka pradavałasia ŭ aŭtamatach, možna było nacadzić ź siropam (3 kap.) abo prostaj bieleńkaj (1 kap.). Pradavalisia šklanyja syfony, jakija možna było zapravić, naprykład, u niekalkich miescach Miensku, adstajaŭšy čarhu. Kaštavała heta ad 3 da 5 kapiejek. Pakul niasieš, pałovu vypješ, pałovu raspyrskaješ na minakoŭ.
Poŭnaściu hety artykuł možna pračytać u papiarovaj i pdf-versii "Našaj Nivy"
Jeva Viežnaviec
Kamientary