Ściahi pa ŭsioj krainie

Ściahi pa ŭsioj krainie

10-ja ŭhodki Deklaracyi ab suverenitecie Respubliki Biełarusi adznačyli 27 lipienia ŭ dziasiatkach haradoŭ krainy

U Miensku adbyŭsia «latučy pikiet», arhanizavany Maładym Frontam, a na płoščy Banhałor z 18 da 22 hadzin hrali viadomyja rok-hurty «NRM», «Novaje Nieba», «Kamełot», a taksama maładyja kalektyvy «Młyn», «Postssriptum», «Z». Sabraŭ kancert kala 300 hledačoŭ.

U Mahilovie byli raźviešanyja dziasiatki bieł-čyrvona-biełych ściažkoŭ. Adnak uračystaje pasiadžeńnie i kancert, što mielisia adbycca ŭ Pałacy kultury šviejnikaŭ, byli sarvanyja ŭładami, paśla čaho bolš za 70 čałaviek z nacyjanalnymi ściažkami prajšli pa centry horada ŭ supravadžeńni milicyi. Abyjšłosia biez ekscesaŭ.

U Horadni adbyłosia niekalki pikietaŭ, prajšli ŭračysty schod i kancert u pałacy «Junactva».

Pikiety, mitynhi i inšyja mierapryjemstvy adbylisia taksama ŭ Navapołacku, Zasłaŭi, Vaŭkavysku i Voranavie, pad Łahojskam.

U mnohich haradach ułady supraćdziejničali. U Bieraści, Biarozie i Pinsku, Marjinaj Horcy, Buda-Kašalovie mierapryjemstvy byli zabaronienyja. U Maładečnie sproba pravieści mitynh u haradzkim parku skončyłasia zatrymańniem niekalkich jaho ŭdzielnikaŭ. U Babrujsku i Baranavičach praviadzieńnie niesankcyjanavanych akcyjaŭ taksama było sarvana milicyjaj.

Latučyja pikiety

Małady Front prydumaŭ novy sposab nahladnaj ahitacyi — «latučyja pikiety». Aprabacyja prajšła pierad Dniom Niezaležnaści: 15 chłopcaŭ i dziaŭčat (dziesiaciora ź ich byli adzietyja ŭ biełaje, a piaciora — u čyrvonaje), fatahrafavalisia na fonie dziaržaŭnych ustanovaŭ, vystrojvajučysia ŭ žyvy bieł-čyrvona-bieły ściah. Maładyja ludzi išli ŭ kampanii žurnalistaŭ dy vialikaj kolkaści milicyjantaŭ i supracoŭnikaŭ specsłužbaŭ. «Latučyja pikiety» paśpieli pabyvać i sfatahrafavacca, trymajučy ŭ rukach lozunhi «Žyvie Biełaruś!», «Moładź za Biełaruś!», la hałoŭnaha korpusu BDU, Domu ŭradu, Mienharvykankamu, KHB, Ministerstva zamiežnych spravaŭ, Kanstytucyjnaha Sudu, Pałacu Respubliki, «nulavoha kilametru», Administracyi prezydenta. Udzielnikam pikietu šmat razoŭ zaharodžvali darohu, a la Domu ŭradu milicyja pasprabavała zatrymać adnaho z žurnalistaŭ, paličyŭšy jaho, vidać, za pikietoŭca (jon byŭ apranuty ŭ čyrvonaje). Apošniaj kropkaj akcyi stała rasiejskaja ambasada, dzie mierkavali ŭručyć petycyju ź vinšavańniami z nahody Dnia Niezaležnaści Biełarusi. Adnak pradstaŭniki Rasiei vinšavańnie brać admovilisia: skazali, faksam dasyłajcie.

Ściahi nad Horadniaj

Kala dziesiaci bieł-čyrvona-biełych ściahoŭ łunali nad samymi vysokimi budynkami Horadni ranicaj 28 lipienia, paviedamlaje BiełaPAN. Takim čynam miascovyja apazycyjanery nahadali haradžanam pra 10-ja ŭhodki suverenitetu krainy. Samy vialiki ściah byŭ zamacavany na raściažkach pamiž šmatpaviarchovymi damami pa vulicy Ŭrubleŭskaha. Tolki kala 10-j ranicy milicyi z dapamohaj pažarnych udałosia likvidavać symbali niezaležnaści na vulicach horada.

Uračysty schod

Bieł-čyrvona-biełym ściaham i himnam «My vyjdziem ščylnymi radami» pačaŭsia ŭračysty schod u haradzienskim Pałacy kultury «Junactva». U prezydyjum zaprasili viadomych u vobłaści ludziej. Usiaho ŭ schodzie ŭdzielničała kala 500 čałaviek.

Siabra Prezydyjumu Viarchoŭnaha Savietu Biełarusi, staršynia Kaardynacyjnaha kamitetu «Haradzienskaja inicyjatyva» Siamion Domaš u svaim vystupie praanalizavaŭ šlach krainy da Niezaležnaści, uzhadaŭ imiony patryjotaŭ daŭnich i blizkich časoŭ. Asabliva była padkreślena, što ciapier krainie jak nikoli pahražaje strata suverenitetu. Da hetaha viadzie palityka panujučaha režymu, jaki zbankrutavaŭ i palityčna, i ekanamična, raskałoŭ nacyju, źniščaje nacyjanalnyja zdabytki – movu, symboliku, śviaty.

Na schodzie vystupili redaktar hazety «Pahonia» Mikoła Markievič, staršynia haradzkoj arhanizacyi BNF Siarhiej Malčyk, staršynia haradzienskaj arhanizacyi BSDP (NH) Michaś Patreba, staršynia haradzkoj filii BSDH Viktar Sazonaŭ, siabra sojmu Maładoha Frontu Siarhiej Antusievič.

Viečar zakončyŭsia śviatočnym kancertam.

Anton Łabovič, Horadnia

Dzień Niezaležnaści na Biarozaŭščynie

Ad 16.00 da 18.30 u Biełaaziorsku 4 siabry Kanservatyŭna-Chryścijanskaj Partyi BNF ładzili pikiet z nahody śviatočnaj daty — u parku kala stadyjonu. Rajonnyja ŭłady nie dazvolili demanstracyi, byccam by tamu, što planavy maršrut prachodziŭ bližej za 50 m ad mnohich pradpryjemstvaŭ i ŭstanovaŭ, nasupierak ciapierašniamu Zakonu ab masavych mierapryjemstvach. Vosiem zavadataraŭ demanstracyi paličyli, što, kali nie dazvolili demanstracyi, dyk pa tym maršrucie možna pravieści śviatočnaje hulańnie ź bieł-čyrvona-biełymi ściažkami, šarykami, stužkami na hałavie. Adznačyŭšy śviata niekalkimi kielichami na druhim kancy horadu, poźnim viečaram ludzi tym ža maršrutam viartalisia nazad. Cichim ciopłym letnim viečaram na vulicy jašče doŭha hučali biełaruskija pieśni.

Siaržuk Rusiecki, Biaroza

Miron u Pinsku

27 lipienia ŭ Pinsku na praspekcie Žałtoŭskaha ŭ rajonie Harpaliva załunaŭ bieł-čyrvona-bieły ściah. Nieviadomyja vyviesili jaho na vysakavoltavaj linii elektrapieradačaŭ u honar Dnia Niezaležnaści.

Praspekt Žałtoŭskaha, dzie byŭ vyviešany bieł-čyrvona-bieły ściah, viadzie da Zachodniaha pramvuzła — rajonu ź niekalkimi bujnymi pradpryjemstvami. Tamu ranicaj rabočyja, što jechali na pracu praz praspekt, mahli bačyć nacyjanalny biełaruski ściah, prymacavany nieviadomymi navat nie da słupa, a prosta da drotu, na adlehłaści niekalkich dziasiatkaŭ metraŭ ad słupa. Pa takich linijach elektrapieradačaŭ pieradajecca napružańnie pamieram 110 tysiačaŭ voltaŭ! Da taho ž, elektraprovad znachodzicca na vyšyni prykładna 15 metraŭ ad ziamli. Ciažka ŭjavić, jak možna było prymacavać ściah u doždž, unačy i ŭ takim miescy biez admysłovaj techniki.

Sa słovaŭ specyjalistaŭ, kab źniać ściah, słužbie linijaŭ Pinskich elektrasietak, mahčyma, daviadziecca na peŭny čas adklučać elektryčnaść (a heta značyć, što bieź śviatła zastaniecca ŭvieś horad) dy nakiroŭvać tudy admysłovuju mašynu z vyškaj. Nam taksama paviedamili, što adklučeńnie vysakavoltavaj linii elektrapieradačaŭ pryraŭnoŭvajecca da nadzvyčajnaha zdareńnia, i dazvoł na heta treba atrymlivać u Bieraści.

Alaksiej Dzikavicki, Pinsk

Partyja Svabody nia śpić

Unačy z 26 na 27 lipienia Biełaruskaja Partyja Svabody zładziła akcyju, prymierkavanuju da Dnia Niezaležnaści Biełarusi: «svabodaŭcy» raśpisali rajony vuł.Anharskaj, Zialonaha Łuhu, Zachadu, Paŭdniovaha Zachadu lozunhami «Biełaruś dla biełarusaŭ!», «Maskal, preč!»

Heta nia pieršaja padobnaja akcyja BPS. Takim samym čynam «svabodaŭcy» adznačali Dzień Abaroncaŭ Ajčyny albo Dzień BKA (23 lutaha). Jak i tady, ciapier abyjšłosia biez zatrymańniaŭ.

Jazep Kupcevič, Miensk