Hetaja impreza, pad nazovam «Plzeńska-biełaruski tuzin», adbyłasia 23 traŭnia 2007 u kaviarni Inkohnita. Inicyjavali viečar Vital Voranaŭ, student Zachodniačeskaha ŭniversytetu ŭ Plzeni, razam ź viadomymi miascovymi českimi litaratarami: Marketaj Čekanavaj i Zdeńkam Zaičkam. Vital Voranaŭ viadomy ŭ biełaruskaj hramadzie jak piśmieńnik i pierakładčyk čužamoŭnych litaraturnych tvoraŭ na biełaruskuju movu. Jahonyja apaviadańni pieradrukoŭvaje j naša hazeta – «Kryvija».
Viečar pačaŭsia čytańniem tolki što vydadzienaj knižki «Dva tuziny plzeńskich kazak» u českim aryhinale i ŭ pierakładzie Vitala Voranava. Paasobnyja parahrafy kazki «Jak naradziŭsia drukarski škodnik Buka» čytała pierš pa-česku suaŭtarka knižki, sp-nia Čekanova, a zatym pa-biełarusku sp.Voranaŭ. Paśla sp-nia Čekanova pračytała českija pierakłady aleharyčnych kazak “Teatar» i «Nie zusim kazka», aŭtarstva sp.Voranava.
Dziela lepšaje infarmacyi prysutnaj publiki byli na ekranie kaviarni pakazanyja ahulnyja dadzienyja ab Biełarusi -- z kamputarnych vyšukalnikaŭ Google, Seznam i Wikipedia. Byŭ taksama pakazany viadomy dakumentalny film «Lekcyja biełaruskaje movy». Hrupa tutejšych biełaruskich studentaŭ padrychtavała haściam pačastunak: biełaruskija dranki j biarozavy sok (jaki, miž inšaha, usim spadabaŭsia). Ctudentka Natalla Bialajeva syhrała na pijaninie muzyčny tvor «Raźvitańnie z radzimaj» kampazytara Ahinskaha. Plzeński biełarus, sp.Alaksandar Daci, pračytaŭ pa-česku svoj pierakład humarystyčnaha tvoru Ŭładzimiera Arłova pra siaredniaviečnuju dziejnaść u Čechii kniazia Žyhimonta Karybutaviča, jaki ŭ XV stahodździ zastupaŭ tut svajho svajaka, vialikaha kniazia litoŭskaha, Vitaŭta.
Naahuł, viečar vyjšaŭ nadziva ŭdała. Šmatlikija hości kaviarni, navat niezaprošanyja na imprezu, z uvahaj vysłuchali čytańni tvoraŭ dy mieli nahodu bližej paznajemicca ź Biełarusiaj -- svaim «niaviedamym słavianskim susiedam». Ažyŭlenaja dyskusija na temu Biełarusi j česka-biełaruskich dačynieńniaŭ zaciahnułasia da poźnich hadzinaŭ viečara.
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty18
Kamientary